د افغانستان اسلامي جمهوري ریاست د چارو ادارې عمومي ریاست کې اطلاعاتو ته د لاسرسي حق او قانون په هکله د پوهاوي پرګرام

اطلاعاتو ته د لاسرسي کمېسیون، اطلاعاتو ته د لاسرسي حق او قانون په هکله د پوهاوي پروګرامونو په لړۍ کې د ولسمشرۍ ماڼۍ د چارو ادارې عمومي ریاست کې د پوهاوي پرګرام ترسره کړ.

دا پروګرام اطلاعاتو ته د لاسرسي کمېسیون کمېشنر ښاغلي حمدالله ارباب، د چارو ادارې مطبوعاتي رییس ښاغلي خوشحال خلیل، د دې ادراې مرستیالانو او د کمېسیون د عامه پوهاوي ټیم په شتون کې ترسره شو.

په پیل کې ښاغلي خوشحال د ښه راغلاست ترڅنګ وویل؛ وګړي، اطلاعاتو ته د لاسرسي قانون په رڼا کې حق لري چې د دولتي ادارو اطلاعاتو ته لاسرسی ولري. نوموړي، اطلاعاتو ته د لاسرسي پر وړاندې تر ټولو مهم خنډ د محرمیت دود شتون وباله او د عامه پوهاوي له لارې کولای شو دا دود ختم کړو. همدارنګه د چارو ادارې مطبوعاتي رییس له کمېسیون سره د دې ادارې د هر اړخیزو همکاریو ژمنه وکړه.

ورپسې ښاغلي ارباب، اطلاعاتو ته لاسرسی یو وګړیز حق وباله او ویې ویل؛ د ادارو له رامنځته موخه خلکو ته د خدمتونو ارایه کول دي. ادارې مکلفې دي؛ له وکړو سره په مشورې وګړو ته خدمتونه وړاندې کړي. هغه همدارنګه زیاته کړه؛ هغه وګړي او خلک کولای شي ادارو ته ښې مشورې ورکړي چې په ادارو کې شته اطلاعاتو ته لاسرسی ولري. د کمېسیون غړي، له وړاندې د اطلاعاتو خپرولو باندې ټینګار وکړ او د قانون په رڼا کې ادارې، حق نه لري چې له غوښتونکو څخه د اطلاعاتو په هکله د دلیلونو غوښتنه وکړي.

په پای کې د کمېسیون تخنیکي سلاکار ښاغلي ولي الله مصباح، د یو پرېزېنټېشن په ارایه کولو سره اطلاعاتو ته د لاسرسي قانون، اطلاعاتو  ته د لاسرسي قانون حقوقي مبنا، اطلاعاتو ته د لاسرسي کمېسیون واکونو، د اطلاعات خپرولو، د ادارو مکلفیتونو، د اطلاع رسوونکي دندو، ، د شکایت ثبتولو او ورته رسېدنې، اطلاعاتو ته د لاسرسي انلاین سېستم په هکله هر اړخیز معلومات ورکړل.