اطلاعاتو ته د لاسرسي کمېسيون د څارنې او ارزونې، د رسنيو او عامه پوهاوي د سلاکارانو د بستونو د آزادې سیالۍ د ازموينې پروسه
د څارنې او ارزونې د سلاکار بست ازموينه، اطلاعاتو ته د لاسرسي کمېسيون رييس ښاغلي عين الدين بهادري، مرستيالې آغلې نجيبې مرام، کمېشنرې آغلې زهرا موسوي، د کمېسيون د دارالانشاء رييس ښاغلي عصمت الله حيدري او څارګر په توګه د روڼتيا څار ادارې استازي ښاغلي اعزاز الله عرفان په شتون کې دوشنبه په ورځ ترسره شوه. ورپسې د رسنيو او عامه پوهاوي سلاکار بست ازموينه د کمېسيون د رييس ښاغلي عين الدين بهادري، مرستيالې آغلې نجيبې مرام، کمېشنرې آغلې زهرا موسوي او د کمېسيون د دارالانشاء د ريیس په شتون کې د سه شنبې په ورځ واخيستل شوه.
روڼتيا او ځواب ويل د ښې حکومتوالۍ له بنسټيزو اصولو او د ملکي خدمتونو د کارکوونکو د ګمارنې په پروسه کې د ښو او وړ کسانو استخدام کې مهم اصل دی. اطلاعاتو ته د لاسرسي کمېسيون ژمن دی چې د کارکوونکو د ګمارنې په پروسه کې له روڼتيا څخه په استفادې د ښې حکومتوالۍ په جوړولو کې خپله رول ادا کړي. له همدې امله د هر بست ازموينه په دوه ليکنې او تقریري ډول په يوه کاري ورځ کې واخيستل شو او پايله يې اعلان شوه.
د يادولو وړ ده چې د څارنې او ارزونې سلاکار بست ۷ تنه شارټ ليست شوي و چې له دې ډلې ۵ تنو په ازموينه کې ګډون وکړ چې په پايله کي يي يو کس د هدف خان په نوم بريالی اعلان شو. سربېره پر دې د رسنيو او عامه پوهاوي سلاکار بست ته ۲۸ کسان شارټ لېست شوي و. له دې ډلې ۲۲ تنو په ليکني ازموينه کې ګډون وکړ او ۷ کسانو يې د مصاحبې ازموينې ته لار پيدا کړه او په پايله کې ښاغلی احسان الله باتور بريالی اعلان شو.
