د چارو ادارې له سرپرست رئیس سره اطلاعاتو ته د لاسرسي کمېسیون د غړو لیدنه
اطلاعاتو ته د لاسرسي قانون د ښه پلي کېدو لپاره د دولتي بنسټونو هر اړخیزو همکاریو ته اړتیا ده. نو هیله مند یو چې ټول دولتي بنسټونه، د دې قانون د موخو پلي کېدو په برخه کې عملي ګامونه واخلي. ځکه نو اطلاعاتو ته دلاسرسي کمېسیون رئیس ښاغلي عین الدین بهادري، مرستیالې آغلې نجیبې مرام، د کمېسیون غړو ښاغلي حمدالله ارباب او زهرا موسوي د ولسمشرۍ چارو ادارې له عمومي رییس ښاغلي الهام عمر هوتکي سره وکتل. د دې لېدنې بنسټیز هدف اطلاعاتو ته د لاسرسي قانون د ښه پلي په برخه کې همغږي او په دې برخه کې د شته ستونزو له منځه وړل وه.
په پیل کې ښاغلي عین الدین بهادري اطلاعاتو ته د لاسرسي قانون په برخه کې د کمېسیون له پرمختګونو په اړه لنډ معلومات وړاندې کړل، همداشان یې اطلاعاتو ته د لاسرسي په برخه کې د وګړو ستونزو په ځانګړي توګه د اطلاع رسونې مراجعو څخه نه ملاتړ او متقاضیانو ته په وخت د اطلاعاتو نه ورکول له جدي ستونزو وبللې. د دولتي ادارو یوه ژمنه د قانون د پلي کولو په برخه کې د اطلاع رسونې مسوولینو څخه ملاتړ دی تر څو د وګړو لاسرسی اطلاعاتو اسانه کړي او د متقاضیانو غوښتنو ته د قانون په رڼا کې ځواب ورکړي.
د ولسمشرۍ چارو ادارې عمومي رییس ښاغلي الهام عمر هوتکي په ادارو کې شته اطلاعاتو ته د وګړو لاسرسي په برخه کې د کمېسیون له کړنو څخه خوښي وښوده او ډاډ یې څرګند کړ چې د چارو په اداره کې به د اطلاع رسونې مسوول ګمارنې او پیاوړتیا څخه ملاتړ کوي او د تر سره شوو غوښتنو په اساس به اطلاعات غوښتونکو ته وړاندې کړي.
څه موده مخکې له یادې ادارې څخه د یو لړ اطلاعاتو غوښتنه شوې وه خو د ادارې مخکینۍ رهبرۍ د اطلاعاتو له وړاندې کولو څخه ډډه کړې وه.
د چارو ادارې عمومي رییس اطلاعاتو ته د لاسرسي قانون په بشپړ ډول پلي کولو باندې ټینګار وکړ او زیاته یې کړه چې د رسمي مکتوب په اساس به ټولو بنسټونو ته د قانون په رڼا کې هدایت وشي چې اطلاعات له وړاندې د وګړو او رسنیو سره شریک کړي او د اطلاع رسونې مسوول ګمارنه دې، د قانون حکمونو سره سم تر سره شي.
ښاغلي هوتکي د لوړ پوړ چارواکو ساتنه او مصونیت د دولت مسوولیت وباله او د کمېسیون د مخکېني وړاندیز پر بنسټ یې څلور موټره چې د کمیسیون غړو لپاره تدارک شوي وو، د کمیسیون غړو ته تسلیم کړل.
