د امریکا د متحده ایالاتو د څار ځانګړې ادارې (SIGAR) مسوولینو سره د کمېسیون رییس او غړو ګډه ناسته
اطلاعاتو ته د لاسرسي کمېسیون رییس ښاغلي عین الدین بهادري او د کمېسیون غړي ښاغلي حمدالله ارباب د امریکا د څار ځانګړې ادارې مسوولینو آغلې مارګاریت او ښاغلي کریس سره د ویډیو کنفرانس له لارې خبرې وکړې. په دې ناسته کې ښاغلي عین الدین بهادري، د ګمارنې پروسه کې د روڼتیا، د کمېسیون کاري دفتر په اړه، د کمېسیون څارنیز پروګرامونو، د انلاین سېستم جوړېدو، اطلاعاتو ته د لاسرسي پنځه کلنې ستراتېژۍ او د عامه پوهاوي پروګرامونو په تړاو خبرې وکړې. ښاغلي بهادري، د اداري فساد پر وړاندې مبارزې، په حکومتوالۍ کې د ګډون او روڼتیا تامینولو په برخه کې اطلاعاتو ته د لاسرسي رول اغېزناک وباله او اطلاعاتو ته لاسرسی یې د ښې حکومتوالۍ په اړه یو مهم ګام عنوان کړ. ورپسې ښاغلي حمدالله ارباب، په ادارو کې د محرمیت دود شتون، اطلاعاتو ته د لاسرسي قانون د پلي کېدو پر وړاندې یو لوی خنډ وښود او د اطلاعاتو دیجیټل کول یې د اطلاع رسونې په برخه کې د اسانتیا مهم اصل وګاڼه ښاغلي ارباب وویل:«په دولتي ادارو کې اطلاعاتو ته د لاسرسي قانون پر وړاندې د ځینو ستونزو تر څنګ اطلاعاتو ته د لاسرسي قانون حق په پلي کولو کې پرمختګونه هم شته». هغه همدارنګه یادونه وکړه، په افغانستان کې د سرچینو ډېره برخه د تمویل کوونکو او بهرنیو بنسټونو لخوا لګول کېږي چې دغو اطلاعاتو ته لاسرسی ستونزمن دی، ځکه نو وړاندیز کېږي چې د امریکا د څار ځانګړې اداره په دې برخه کې له اړوندو بنسټونو سره خبرې وکړي او هېوادوالو ته د اطلاعاتو ته د لاسرسي زمینه برابره شي. په پای کې آغلې مارګاریت او ښاغلي کریس، له کمېسیون څخه د سیاسي ملاتړ تر څنګ د انلاین سېستم، د مېک او پلټنې عالي ادارې سره د کمېسیون کار، د کارکوونکو ګمارنې پروسې، اطلاعاتو ته د لاسرسي قانون حق په تړاو عامه پوهاوی، د فساد پر وړاندې مبارزې سکرتریت سره د کمېسیون کار، د فساد پر وړاندې مبارزې په برخه کې د ستراتېژۍ پلي کول او د جینوا ناستې په تړاو د کمېسیون ژمنو په اړه پوښتنې وکړې چې ښاغلي بهادري او ښاغلي ارباب ورته هر اړخیز ځوابونه ورکړل. همداشان یې په ملي او نړیوالو پروګرامونو کې اطلاعاتو ته د لاسرسي حق تامینولو په اړه د څارنې ځانګړې ادارې ته وړاندیزونه مسوولینووکړل
