اطلاعاتو ته د لاسرسي دود عامولو او پیاوړتیا په برخه کې د اکاډمیکو بنسټونو رول اغېزمن دی
اطلاعاتو ته د لاسرسي دود عامولو او پیاوړتیا په پار له تحصیلي بنسټونو سره د لاهمغږۍ په موخه اطلاعاتو ته د لاسرسي کمېسیون د دارالانشا رییس ښاغلي عصمت الله حیدري، د کابل پوهنتون رییس ښاغلي محمد عثمان بابري سره وکتل.
په دې ناسته کې ښاغلي عصمت الله حیدري وویل؛ د افغانستان حکومت ملي او نړیوالو تعهداتو ته په کتو اطلاعاتو ته د لاسرسي قانون وضع او د دې قانون په اساس یې اطلاعاتو ته د لاسرسي کمېسیون جوړ کړی دی. ښاغلي حیدري، اطلاعاتو ته د لاسرسي حق او قانون تامینولو په برخه کې د اګاډمیکو بنسټونو په اړه وویل:« اطلاعاتو ته د لاسرسي دود عامولو او پیاوړتیا په برخه کې د تحصیلي بنسټونو رول مهم او اړین دی؛ نو پر همدې اساس اړتیا ده چې د کمېسیون او تحصیلي بنسټونو په ځانګړي ډول د کابل پوهنتون چې په زده کړیز چاپېریال کې مهم بنسټ دی ترمنځ همکاري او همغږي لا زیاته شي». نوموړي، اطلاعاتو ته د لاسرسي کمېسیون او کابل پوهنتون ترمنځ د همکارۍ هوکړې پر بنسټ د کابل پوهنتون استادانو او زده کړیالانو ته د عامه پوهاوي پروګرامونو یادونه وکړه او د دې پروګرامونو پلي کولو ته په ګوتڅنډه یې، اطلاعاتو ته د لاسرسي حق او قانون په برخه کې په تل پاتو اړیکو ټینګار وکړ.
ورپسې ښاغلي محمد عثمان بابري، د کمېسیون د دارالانشا رییس خبرو تایید، سربېره د دواړو بنسټونو ترمنځ د هوکړې د موادو عملي کولو او همکارۍ اعلام وکړ، هغه زیاته کړه؛ کابل پوهنتون د بدلون پلان ترتیب کړی او اطلاعاتو ته د لاسرسي حق تامین سکالو یې د دې بنسټ کاري پلان کې شتون لري. ښاغلي بابري وغوښتل چې اطلاعاتو ته د لاسرسي کمېسیون او کابل پوهنتون ترمنځ دې ګډه کمېټه جوړه او اطلاعاتو ته د لاسرسي حق دود اوپیاوړتیا باندې د عملي کړنې ترسره شي.
