د اطلاعاتي بانک په رامنځته کولو او د اطلاعاتو ډیجیټل کولو په وسیله کولای شو اطلاعاتو ته د لاسرسي حق تامین لپاره زمینه اسانه کړي
د وګړیزې ټولنې پرمختیا او په ځانګړي توګه د علمي څېړنو زیاتوالي لپاره اطلاعاتو ته لاسرسی اړین دی. د پوهې تولید او ځواب ویونکي دولت لرلو لپاره؛ اړتیا ده چې اطلاعاتو ته د لاسرسي قانون د احکامو په رڼا کې، په ادارو کې شته اطلاعاتو ته هېوادوال په اسانه لاسرسی ولري. له همدې امله اطلاعاتو ته د لاسرسي کمېسیون کوښښ کوي چې په دې بنسټ کې شته ټول اطلاعات او سندونه ډیجیټل تولید کړي او په انلاین ډول یې د عام وګړو، خبریالانو او څېړنونکو په واک کې ورکړي، ترڅو ټولو اطلاعاتو د اسانه لاسرسي په پار زمینه برابره کړي
پر همدې بنسټ اطلاعاتو ته د لاسرسي کمېسیون رییس ښاغلي عین الدین بهادري او د کمېسیون د مختلفو څانګو مسوولینو د سندونو ډیجیټل کولو لپاره په کابل پوهنتون کې د افغانستان د معلوماتو مرکز (ACKU) له تجربو څخه د ګټې اخیستنې په پار له دې مرکز څخه لیدنه وکړه. دا لیدنه د افغانستان د معلوماتو مرکز رییس ښاغلي وحید وفا په همکارۍ او لارښونه ترسره شوه.
په کابل پوهنتون کې د افغانستان د معلوماتو مرکز، په سیمه کې د تاریخي څېړنیزو سندونو راټولولو، ورکولو او ډلبندۍ ترټولو مهم او مخکښ بنسټ دی. د دې سندونو ډېره برخه چې د دې مرکز په آرشیف کې ساتل کېږي؛ په ډيجيټل ډول هم ورکول کېږي. د دې مرکز ماموریت د کتاب لوستلو دود عامول، د اکاډمیکو څېړنو لپاره د څېړنیزو سرچینو بډایه کول او څېړنیز پروګرامونه دي. دې بنسټ ډېر پخواني او اوسني سندونه راټول او ډیجیټل کړي یي دي، ترڅو ټول وګړي په انلاین ډول ورته لاسرسی ولري.
په پای کې اطلاعاتو ته د لاسرسي کمېسیون، د ښاغلي وحید وفا له همکاریو او لارښوونو، همدارنګه له کمېسیون سره د سندونو په ډیجیټل کولو کې ددې مرکز د دومداره همکاریو ژمنې مننه وکړه.
