د کلو بيارغونې او پراختيا وزارت له خوا د اطلاعات نه ورکولو په هکله د شکایت څېړلو ناسته
دا ناسته اطلاعاتو ته د لاسرسي کمېسيون د شکایتونو ته رسېدنې آمر، حقوقي سلاکار، د څارنې او ارزونې آمر، د کلو بيارغونې او پراختيا وزارت د اطلاع رسونې مسوول، د عامه پوهاوي او اطلاعاتو رييس ښاغلي محمد داوود نعيمي په شتون کې اطلاعاتو ته د لاسرسي کمېسيون دفتر کې ترسره شوه.
په پيل کې د شکایت کوونکي د موضوع څېړلو (د خوست ولايت د علي شېر ولسوالۍ د هارون خيلو، قدم او صديق سيمو اړوند د محافظتي ديوال پروژې په اړه) بحث او د اندونو تبادله وشوه.
په دې ناسته کې ښاغلي داوود نعيمي، د اطلاعاتو نه ورکولو او ځنډ په اړه دلايل وړاندې کړل. په ځواب کې يې حقوقي سلاکار ښاغلي محمد حسن پويا او شکایتونو ته د رسېدنې آمر ښاغلي رحمت الله پيروزي اطلاعاتو ته د لاسرسي قانون په رڼا کې وویل چې ددې اطلاعاتو ورکولو په برخه کې هېڅ کومه قانوني مانع نشته او د قانون په رڼا کې يې بايد غوښتونکي ته ورکړي.
په پای کې د کلو بيارغونې او پراختيا وزارت د اطلاعاتو او عامه پوهاوي رييس او د اطلاع رسونې رييس ژمنه وکړه چې د غوښتل شويو اطلاعاتو ورکولو په برخه کې به همکاري او غوښتونکي ته به يې ورکړي.
