اطلاعاتو ته د لاسرسي کمېسیون مشرتابه او د کابل ښاروالۍ د خپرونو او عامه پوهاوي رییس تر منځ لیدنه
دا لیدنه اطلاعاتو ته د لاسرسي کمېسیون منشي او کمېشنر ښاغلي حمدالله ارباب، د دارالانشا رییس ښاغلي عصمت الله حیدري او د کابل ښاروالۍ د خپرونو او عامه پوهاوي رییس ښاغلي نعمت الله بارکزي په شتون کې اطلاعاتو ته د لاسرسي کمېسیون په دفتر کې تر سره شوه.
په پیل کې ښاغلي بارکزي، اطلاعاتو ته د لاسرسي کمېسیون د کړنو د ستاینې تر څنګ، د روڼتیا او د دولتي ادارو لخوا وګړو ته د ځواب ویلو په تړاو خبرې وکړې. ښاغلي بارکزي دولت د اطلاعاتو امانتدار او وګړي یې د اطلاعاتو مالکان وبلل. ځکه نو خلک حق لري چې په ادارو کې شته اطلاعاتو د قانون د حکمونو په رڼا کې لاسرسی ولري.
ورپسې ښاغلي ارباب وویل، اطلاعات باید له وړاندې خپاره شي تر څو وګړي د حکومت له کړنو څخه څارنه وکړي او د خلکو ګډون ته په واقعي ډول زمینه برابره شي. هغه زیاته کړه؛ د ښاروالۍ د کړنو او فعالیتونو په اړه اطلاعاتو ته د وګړو لاسرسی، د ښاروالۍ د پروژو په پروسه کې د کیفیت او روڼتیا ضمانت کوي.
په پای ښاغلي نعمت الله بارکزي، ډاډ ورکړ چې د کابل ښاروالۍ د اطلاعاتو ټولې پروسې او د اطلاعاتو ورکول به اطلاعاتو ته د لاسرسي قانون په رڼا کې تنظیم کړي
