په ښې حکومتولۍ کې اطلاعاتو ته د لاسرسي نقش
نېټه: سه شنبه، ۱۶ ميزان ۱۳۹۸
اطلاعاتو ته د لاسرسي کميسيون رئيس عين الدين بهادري د اشنا پوهنتون مسئولينو، استادانو او محصلينو ته په ښې حکومتولۍ کې اطلاعاتو ته د لاسرسي د نقش او بېلابېلو ابعادو په باب خبرې وکړې.
ښاغلي بهادري وويل اطلاعاتو ته لاسرسی په معاصر وخت کې د پرانيستې او ښې ډيموکراټيکې حکومتولۍ يو اساسي رکن دی. اطلاعاتو ته لاسرسی په ډيموکراټو نظامونو کې د يو بشري حق په توګه مطرح دی چې ټول اتباع بايد له دې حق څخه برخمن وي. له نېکه مرغه د افغانستان د اساسي قانون د ۵۰ مادې پر اساس اطلاعاتو ته د لاسرسي قانون جوړ او توشيح شو او حکومتي ادارې يې پر حساب ورکونې مکلفې کړې.
هغه زياته کړه اطلاعاتو ته لاسرسی هغه مهال تامينېدای شي چې خلک اګاه کړل شي او دوی له خپل دې حق څخه په استفادې له ادارو څخه د اطلاعاتو غوښتنه وکړي. هر څومره چې د اطلاعاتو غوښتنه وشي هغومره په حکومتولۍ کې د خلکو مشارکت زياتيږي.
نوموړي وويل اطلاعاتو ته لاسرسی د اداري فساد پر ضد د مبارزې لپاره کيلي ده. د معاش، دفتري امتيازاتو، د وسايطو د امتيازاتو، پروګرامونو، د ادارو د مشاورينو د امتيازاتو او د هغوی د اغېز، انکشافي پروژو او د هغوی د تطبيق د ډول او مختلفو مواردو په باب د اطلاعاتو غوښتنه د دولت د اغېزناکو کارونو او د ملت له خوا پر حکومت مستقيم نظارت ته لار هواروي.
شفافيت، په حکومت کې د خلکو ګډون او د اداري فساد پر ضد مبارزه هغه څه دي چې اطلاعاتو ته د لاسرسي په صورت کې امکان لري. د محرميت فرهنګ په دولتي او غيردولتي ادارو کې فساد رامنځته کوي. اطلاعاتو ته د لاسرسي په مرسته تاسو په يوه اداره کې د هر ډول فساد د کشف توان لرلای شئ.
هغه په وروستيو کې وويل اطلاعاتو ته لاسرسی د ډيموکراسۍ د اکسېجن حيثيت لري چې له دې پرته پرانيستې او ښه حکومتولي ناممکنه ده.
همدارنګه د اطلاعاتو د غوښتنې، د شکاياتو د ثبت او کميسيون ته د رسېدګۍ په اړه خبرې وشوې او د ګډونوالو پوښتنو ته ځوابونه وويل شول.
