د کرنې وزارت اطلاع رسونې او اړوندو برخه څخه لیدنه
اطلاعاتو ته د لاسرسي کمیسیون د پرانیستې حکومتولۍ ګډون مجتمع د سپارښتونو پر بنست، د کابو ۶۰ ادارو د اطلاع رسونې د مرجع د پیاوړتیا په موخه یو لړ فعالیتونه پلان کړل، چي د يادو فعالیتونو په لړۍ کې د چنګاښ په ۳۰مه نیټه د څلورو تر پام وړ لاندې ادارو د مرجع مسئوولینو ته د تجربو او زده کړې تر لاسه کولو په موخه د کړنۍ وزارت له بیلابیلو برخه څخه د لیدنې زمینه برابره کړه.
په دغه لیدنه کې د اطلاعاتو او فرهنګ وزارت، د کاڼونو او پطرولیم وزارت او اداري اصلاحاتو کمیسیون د اطلاع رسونې د مرجع مسئوولینو ګډون درلود، چې د کرنې وزارت د اطلاع رسونې د مسئوولې مرجع او هلته شته امکاناتو، د اسنادو ډیجیتلي او فزیکي آرشیف او د اطلاعاتو د مدیریت له سیسټم څخه لیدنه وکړه.
د یاد وزارت د اطلاع رسونې مرجع چې د اړتیا وړ تخینکي وسایلو باندې سمباله وه، کولای شي د ایمیل او مرجع ته د متقاضیانو په فزیکي مراجعې سره، د دوی د اړتیا وړ اطلاعات، د ډیجیتلي آرشیف او د اطلاعاتو د مدیریت سیستم په مټ، ډیر ژر برابر او د متقاضیانو په اختیار کې ورکړي.
ډیجیتلی آرشیف په سافټ او هارډ ډول د کرنې وزارت اړوند اطلاعات په منظمه توګه آرشیف او ساتي، چې د اړتیا په وخت کې په ډیرې چټکتیا او اسانۍ سره د لاسرسي وړ دي، همدا راز د اطلاعاتو د مدیریت سیسټم چې ۱۴ برخه لري د کرنې وزارت فعالیتونو او د پروژو اړوند اطلاعات په آنلاین بڼه خپروي او د انټرنټ له لارې د لاسرسي وړ دي.
په پروګرام کې د نورو ادارو د اطلاع رسونې مسئوولینو د هغو اسانتیاوو چې په کرنې وزارت کې برابرې شوې، په لیدو خوښي وښوده او ژمنه یې وکړه چې دوی به هم په خپلو ادارو کې د وړته اسانتیاوو او سیسټمونو د جوړولو نظریه له خپلو چارواکو سره شریکه کړي.
