د کابل او ولایتي خبریالانو ته د پوهاوي پروګرام

اطلاعاتو ته د لاسرسي کمیسیون د انترنیوز په همکارۍ د کابل او ځینو ولایاتو خبریالانو او رسنیزو فعالینو ته د وري په ۱۱مه د پوهاوي پروګرام دایر کړ.
په دغه پروګرام کې آغلې نجیبې مرام د کمیسیون سرپرستې او مرستیالې او آغلې زهرا موسوي د کمیسیون غړې، پخپل وار سره اطلاعاتو ته د لاسرسي اړوند مهم مسایل له خبریالانو سره شریک کړل او دوی یې وهڅول چې پخپلو ورځنیو فعالیتونو کې، اطلاعاتو ته د لاسرسي قانون پر بنسټ له اداراتو څخه د اطلاعاتو غوښتنه وکړي، دوی همدا راز ټینګار وکړ:

کچیري ادارې د اطلاعاتو په وړاندې کولو کې ناغیړي کوي او یا هم اطلاعات پخپل وخت له خبریالانو سره نه شریکوي، نو دوی کولای شي خپل شکایتونه په کمیسیون کې ثبت کړي، تر څو د قانون مطابق د دوی غوښتنې ته رسیدنه وشي.
د پروګرام په دوهمه برخه کې ولی الله مصباح د کمیسیون تخنیکي مشاور د پرزنټیشن له لارې ګډونوالو ته د قانون په اړه مفصل معلومات وړاندې کړل او د دوی پوښتنې یې د قانون د حکمونو پر بنسټ ځواب کړې.
د یادولو وړ ده چې اطلاعاتو ته لاسرسي کمیسیون د شته امکاناتو پر بنسټ د ټولنې له بیلابیلو ښکیلو غاړو سره د مختلفو پروګرامونو له لارې د قانون په اړه د پوهاوي پروګرامونه دایروي تر څو له یاد قانون څخه د خلکو د پوهاوي کچه جګه شي او دوی وشي کړای د اطلاعاتو د غوښتنې له لارې د فساد سره روانه مبارزه لا ګړندۍ او پراخه کړي.