د ښځو چارو وزارت کې اطلاعاتو ته د لاسرسي قانون په اړه د پوهاوي پروګرام
دا پروګرام اطلاعاتو ته د لاسرسي کمېسیون کمېشنرې آغلې زهرا موسوي، تخنیکي سلاکار ښاغلي ولي الله مصباح، رییسانو، آمرینو او کارکوونکو په شتون کې د ښځو چارو په وزارت کې ترسره شو.
په پیل کې د ښځو چارو وزارت د عامه اړیکو او مطبوعاتو رییسې آغلې شکیلا نظري، اطلاعاتو ته د لاسرسي کمېسیون د مشرتابه هیئت ته د ښه راغلاست تر څنګ؛ په دې وزارت کې اطلاعاتو ته د لاسرسي حق په برخه کې د کړنو په هکله معلومات وړاندې کړل. هغې وویل؛ اطلاعاتو ته لاسرسی په دولتي ادارو د روڼتیا او ځواب ویلو په مانا ده.
ورپسې آغلې زهرا موسوي وویل؛ اطلاعاتو ته د لاسرسي حق، د ښځو چارو وزارت له ماموریت سره چې د ښځو حقونو تامینول دې، نږدې اړیکه لري. ځکه اطلاعاتو ته لاسرسی یو بشري حق دی او ښځې باید له یاد بشري حق څخه بشپړې برخمنې شي. آغلې موسوي زیاته کړه؛ د دولتي ادارو لخوا د اطلاعاتو نه ورکول په هغې اداره کې د فساد پر موجودیت دلالت کوي.
په پای کې اطلاعاتو ته د لاسرسي کمېسیون تخنیکي سلاکار ښاغلي ولي الله مصباح، د یو پرېزینټېشن له لارې، اطلاعاتو ته د لاسرسي حق په هکله هر اړخیز معلومات وړاندې کړل.
