د پوهنې له وزیر سره اطلاعاتو ته د لاسرسي کمیسیون د رییس او مرستیالې لیدنه
نېټه: یکشنبه د وږي ۱۰ مه، ۱۳۹۸
اطلاعاتو ته د لاسرسي کمیسیون رییس ښاغلي عین الدین بهادري او آغلې نجیبې مرام د دغه کمیسیون مرستیالې د اطلاع رسونې مرجع د مسؤل د پیاوړتیا، د اطلاعاتو د ډیجیټلي کولو، په ولایاتو کې د اطلاع رسونې د مسؤلینو د ټاکلو او اطلاعاتو ته د لاسرسي قانون اړوند اطلاعاتو ته د خلکو د لاسرسي د حق د خوندیتوب په خاطر د عامه پوهاوي پروګرامونو د سرته رسولو په منظور د پوهنې له وزیر ښاغلي داکتر میرویس بلخي سره ولیدل.
لومړی د اطلاع رسونې مسؤل ته د اطلاعاتو د شریکولو اړوند د صلاحیت پر ورکړې، په دغه وزارت کې د اطلاع رسونې د مسؤل د دفتر له پاره د اړوندو تجهیزاتو او امکاناتو پر برابرولو، او په عصري ډول د اطلاع رسونې د ډیجیټلي سیستم پر رامنځته کولو خبرې وشوې او دا چې اطلاعات باید مخکې له مخکې په آنلاین بڼه داسې چې د خلکو لاسرسی ورته آسانه وي خپاره شي.
همدارنګه د اداراتو مسؤلینو او کارکوونکو ته اطلاعاتو ته د لاسرسي قانون په هکله پوهاوی چې خلکو او د اطلاعاتو غوښتونکو ته په ممکنه کم وخت کې د اطلاعاتو ورکړه او د اطلاعاتو خپرول یې یو ضروري کار وباله او زیاته یې کړه چې په دې اړوند د کمیسیون له خوا خلکو او دولتي ادارو ته د عامه پوهاوي بهیر روان دی.
دلیدنې په جریان کې د پوهنې وزیر محترم داکتر میرویس بلخې وویل؛ سره له دې چې اطلاعاتو ته لاسرسی د خلکو او کارکوونکو له پاره یو نوی څیز دی خو د هغوی لیدلوری په دې اړوند اوس هم پخوانی دی او سره د پراخو تشکیلاتو او کاري حجم چې په دغه اداره کې شته موږ هڅه کوو چې د اطلاع رسونې په کار کې پر وخت خلکو ته اطلاعات ورکړو. د پوهنې وزیر همدارنګه وعده وکړه چې د اطلاعاتو په ډیجیټلي سیستم، په ولایتونو کې د اطلاع رسونې د مسؤلینو په توګه د وړ او اغیزناکو افرادو پر ګومارنې او د هغوی په پیاوړتیا کار وکړي. ددې تر څنګه نوموړي د حکومت په رسنیز مرکز کې اطلاعاتو ته د لاسرسي کمیسیون له خوا د ځواب ویلو او ۵۲ دولتي ادارو د وېب پاڼو د څارنې د دوه مخکینیو راپورونو او هم د ادارو او مامورینو په کچه د عامه پوهاوي په تړاو خپل ځانګړي وړاندیزونه څرګند کړل. په پای کې د دغه وزارت مشرتابه ژمنه وکړه چې اطلاعاتو ته د لاسرسي حق د خوندیتوب په هکله به د کمیسیون سره هراړخیزه همکاري وکړي.
