د قانون حاکمیت لپاره اطلاعاتو ته د لاسرسي کمېسیون سره د حمیدې برمکي موسسې د همکارۍ هوکړې لاسلیک
دا هوکړه لیک، اطلاعاتو ته د لاسرسي کمېسیون رییس ښاغلي عین الدین بهادري، غړې آغلې زهرا موسوي او د قانون حاکمیت لپاره حمیده برمکي موسسې اجرایوي رییس ښاغلي سید حمید ضیا په شتون کې اطلاعاتو ته د لاسرسي قانون په هکله د پوهاوي په برخه کې د همکارۍ په پار اطلاعاتو ته د لاسرسي کمېسیون په دفتر کې لاسلیک شوه.
په هېواد کې د قانون حاکمیت لپاره د حمېدې برمکي موسسه یو له فعالو بنسټونو څخه دی. یاد بنسټ د دولتي جوړښتونو، د مدني ټولنو او بنسټونو، کورنیو او بهرنیو اکاډمیکو موسسو په همکارۍ په افغانستان کې د قانوني ارزښتونو پلي کولو لپاره ارزښتناک پروګرامونه ترسره کړي. پر همدې بنسټ اطلاعاتو ته د لاسرسي کمېسیون، اطلاعاتو ته د لاسرسي دود پیاوړي کولو او د دې حق په اړه د وګړو د پوهاوي کچې لوړولو په پار اطلاعاتو ته د لاسرسي کمېسیون او د حمیدي برمکي موسسې ترمنځ په ادارو کې شته اطلاعاتو ته د قانون په رڼا کې اسانه لاسرسي لپاره د همکارۍ هوکړه لیک لاسلیک شو.
