د خبریالانو ورځ
کابل: د بیان ازادي د بشر حقونو له بنسټیزو حقونو څخه دی چې په ملي او نړیوالو سندونو کې یې په صراحت ملاتړ شوی او دولتونه یې د دې حق په تامینولو باندې اړ کړي دي. د بیان ازادي د ټولنې له بنسټیزو عناصرو څخه ده او په ډیموکراتیکو ټولنو کې د اهمیت وړ دی. په داسې ټولنو کې خبریالان او د رسنیو چلوونکي د بیان د ازادۍ لومړني پیاوړي کوونکي شمېرل کېږي.
په هېواد کې د بیان د ازادۍ پیاوړي کول او د رسنیو زیاتوالی د افغانستان دولت له مهمو لاسته راوړنو څخه دي او له شک پرته خبریالانو د بیان ازادي په پیاوړي کولو کې مهم رول لوبولی دی، د ازادو اطلاعاتو دوران د ملت او دولت اړیکې تامینوي. د زیاتو ستونزو شتون سره سره خبریالانو و کولای شول په دې وروستیو کلنو کې د سیاسي، اقتصادي، ټولنیزو او فرهنګي خبرونه د وګړو د پوهاوي کچې لوړتیا، فساد پر وړاندې مبارزې او د دموکراتیک حکومت منځته راوړلو په برخه کې نه ستړې کېدونکې هلې ځلې کړي دي.
د خبریالانو کار ته په کتو او تاثیر یې زموږ په سیاسي، اقتصادي، ټولنیز او فرهنګي ژوند باندې ایجابوي چې ټول دولتي بنسټونه او ټولنیزې ډلې له رسنیو سره هر اړخیزه همکاري وکړو او خبریالانو ته په ولایتو او مرکز کې د ښه کاري فرصت زمینه برابره کړو تر څو خبریالان او د رسنیو چلوونکي خپل رسالت په ښه توګه په ټولو پرمختیایي حوزو کې مخته یوسي.
اطلاعاتو ته د لاسرسي کمېسیون، د کب ۲۷ مه ټولو خبریالانو او د رسنیو چلوونکو ته مبارک او ټول هغه دوستان چې په دې لاره کې شهیدان شوي له الله څخه ورته د جنت فردوس غوښتنه کوي. کمېسیون ژمن دی چې له ټولو دولتي او مدني بنسټونو سره په همغږۍ اطلاعاتو ته د لاسرسي قانون په برخه کې اسانتیاوې رامنځته کړي تر څو خبریالان وکړای شي د قانون په رڼا کې په ادارو کې شته اطلاعاتو ته لاسرسی ولري او د ازادو اطلاعاتو په خپرولو کې موثر اقدامات ولري.
