د حج او اوقافو وزیر سره اطلاعاتو ته د لاسرسي کمېسیون د مشرتابه لیدنه
دا لیدنه اطلاعاتو ته د لاسرسي کمېسيون ښاغلي عین الدین بهادري، منشي او کمېشنر ښاغلي حمدالله ارباب، د حج او اوقافو وزیر ښاغلي محمد قاسم حلیمي په شتون کې د ګډو همکاریو په پار په یاد وزارت کې تر سره شوه.
په پیل کې ښاغلي بهادري، اطلاعاتو ته د لاسرسي کمېسیون په هکله خبرې وکړې او ویې ویل؛ اطلاعاتو ته د لاسرسي قانون عمده موخې په دولتي ادارو کې د روڼتیا، ځواب ویل او د فساد پر وړاندې مبارزه ده. هغه زیاته کړه؛ اطلاعاتو ته لاسرسی د اداري فساد پر وړاندې مبارزې لپاره اساسي رکن دی. ښاغلی بهادري د مسجدونو لخوا اطلاعاتو ته د لاسرسي حق په هکله د پوهاوي په برخه کې د حج او اوقافو وزارت د همکارۍ غوښتونکی شو.
ورپسې د حج او اوقافو وزیر ښاغلي مولوي محمد قاسم حلیمي، د کمېسیون د کړنو د ستاینې تر څنګ، له دې کمېسیون سره یې د روڼتیا او فساد سره مبارزې په برخه کې د وزارت هر ډول همکاریو څخه ډاډ ورکړل او ویې ویل؛ موږ به له امکاناتو څخه په ګټنې اطلاعاتو ته د لاسرسي کمېسیون سره همکاري وکړي. ښاغلي حلیمي زیاته کړه، په حج او اوقافو وزارت کې هېڅ هم محرم نه دي؛ ټول وګړي حق لري او کولای شي د یاد وزارت ټولو پروسو او اطلاعاتو ته لاسرسی ولري.
په پای کې ښاغلي ارباب وویل؛ اطلاعاتو ته لاسرسی د هېوادوالو بشري او شرعي حق دی. هغه د پوهاوي او فساد پر وړاندې مبارزې په برخه کې د علماوو رول مهم وباله او اطلاعاتو ته د لاسرسي قانون او حق په هکله د پوهاوي په برخه کې یې د علماوو په همکارۍ ټینګار وکړ.
په پای کې پرېکړه وشوه چې د ګډو موخو او همکاریو لپاره، اطلاعاتو ته د لاسرسي کمېسیون او حج اوقافو وزارت ترمنځ دې هوکړه لاسلیک شي.
