د اداري اصلاحاتو او ملکي خدماتو لخوا ملي دفاع وزارت ته د ورپېژندل شویو کسانو له استازو سره د هغوی د ستونزو په اړه لیدنه
نیټه: شنبه، ۹ سنبله ۱۳۹۸
نن له غرمې مخکې د ۳۰۲ تنو له استازو سره چې د اداري اصلاحاتو د کمیسیون د پروسې له لارې بریالي شوي او ملي دفاع وزارت ته د استخدام په موخه ورپېژندل شوي مګر تر اوسه یې له دغه وزارت څخه د خپلې ګومارنې اړوند څرګند ځواب نه دی ترلاسه کړی ولیدل شو.
په دې لیدنه کې د استازو له خوا ځیني ستونزې لکه اطلاعاتي تشه، په مختلفو پلمو د بریالي شویو افرادو د ګومارنې څخه انکار لکه د قومي جوړښت په نظر کې نه نیول او یا د کشف د پروسې نه بشپړتیا، یادې شوې.
هغوی وویل چې ۳ میاشتې کیږي د اداري اصلاحاتو د کمیسیون له خوا د ګومارنې له پاره د ملي دفاع وزارت ته ورپېژندل شوي مګر ددغه وزارت له خوا په دې اړوند هیڅ ډول اقدام نه دی ترسره شوی او د بریالي شویو کسانو سره د هغوی د ګومارنې د پروسې په تړاو هیڅ ډول اطلاعات نه دي شریک شوي.
اطلاعاتو ته د لاسرسي کمیسیون غړو ښاغليو حمدالله ارباب او فضل الباري بریالي د دې کسانو استازو ته د ښه راغلاست ویلو تر څنګ وویل چې اطلاعاتو ته د لاسرسي قانون پر اساس ټولې ادارې اړ دي چې د ګومارنې په پروسه کې هر ډول اطلاعات چې کاندیدان او بریالي کسان یې غوښتنه کوي هغوی ته ورکړي، په دې اړه به د کمیسیون له خوا تاسې سره هراړخیزه مرسته وشي او دا موضوع به په جدي توګه تعقیب کړي.
