اطلاعاتو ته د لاسرسي حق او قانون په هکله کابل ښاروالۍ کې د پوهاوي پروګرام ترسره کول
دا پروګرام اطلاعاتو ته د لاسرسي کمېسیون د مرستیالې آغلې نجیبې مرام، د کابل ښاروال ښاغلي محمد داود سلطان زوی، د کابل ښاروالۍ رییسانو او کارکوونکو په شتون کې اطلاعاتو ته د لاسرسي حق او قانون د پوهاوي په موخه تر سره شو.
په پیل کې ښاغلي سلطان زوی، اطلاعاتو ته د لاسرسي کمېسیون، اطلاعاتو ته دلاسرسي حق په هکله د پوهاوي پروګرامونو ترسره کولو ستاینه وکړ او دا یې په ډیموکراټیکو ټولنو کې یو اړین امر وباله هغه وویل:« يوه پوهه او اطلاعات لرونکې ټولنه په ټولو برخو کې ښې پرېکړې کولای شي». ښاغلي سلطان زوی زیاته کړه؛ په ټولنه کې اطلاعاتو ته د لاسرسي حق دودول د پوهې تولید لامل کېږي. په پای کې ښاغلي سلطان زوی، په کابل ښاروالۍ کې اطلاعاتو ته د لاسرسي حق تامینولو څخه ډاډ ورکړ.
ورپسې آغلې مرام، اطلاعاتو ته لاسرسی د بشر حقونو له ډلې بنسټیز حق وباله او ویې ویل:« د قانون په رڼا کې ادارې مکلفې دي چې غوښتل شوي اطلاعات د غوښتونکو او هېوادوالو په واک کې ورکړي». هغې زیاته کړه؛ له وړاندې د اطلاعاتو ورکول په اداره کې د فساد نشتوالي باندې دلالت کوي. سربېره پر دې آغلې مرام، د کابل ښاروالۍ له ټولو برخو د اطلاع رسونې مسوول سره د همکارۍ غوښتونکې شوه.
په پای کې د کمېسیون د عامه پوهاوي آمر ښاغلي خلیل جیحون، د یو پرېزېنټېشن په ارایه کولو سره اطلاعاتو ته د لاسرسي قانون، اطلاعاتو ته د لاسرسي قانون حقوقي مبنا، اطلاعاتو ته د لاسرسي کمېسیون واکونو، د اطلاعات خپرولو، د ادارو مکلفیتونو، د اطلاع رسوونکي دندو، ، د شکایت ثبتولو او ورته رسېدنې، اطلاعاتو ته د لاسرسي انلاین سېستم په هکله هر اړخیز معلومات ورکړل.
