د افغان پامیر لوړو زدهکړو مؤسسه کې د پوهاوي پروګرام
نیټه: د لړم ۲۶مه ۱۳۹۸
اطلاعاتو ته د لاسرسي کمیسیون هڅه کوي د قانون پر اساس او اطلاعاتو ته د لاسرسي ارزښت ته پام سره چې د روڼتیا، حساب ورکړې او ښې حکومتولۍ په برخه کې یې لري، په دولتي او خصوصي پوهنتونونو کې د پوهاوي پروګرامونو دایرولو له لارې د اطلاعاتو غوښتنې کچه لوړه کړي، تر څو په حکومتولۍ کې د خلکو د ګډون زمینه برابره شي.
په دې اساس اطلاعاتو ته د لاسرسي قانون څخه د پوهاوي پروګرام د اغلې زهرا موسوی د کمیسیون غړې، د افغان پامیر لوړو زدهکړو مؤسسې رئیس او زدهکړیالانو په ګډون د یاد پوهنتون د کنفرانسونو په تالار کې دایر شو.
اغلي زهرا موسوي اطلاعاتو ته لاسرسی د وګړو له اساسي حقوق څخه وباله او له یاد حق څخه پوهاوی یې ټولو وګړو په ځانګړې توګه زده کریالانو ته اړین وباله، نوموړې یادونه وکړه چې د اطلاعاتو اصلي مالکین خلک دی او دولت او مسئوولین د اطلاعاتو ساتونکي دي، د نوموړې په بارو اطلاعاتو ته لاسرسی د حساب ورکونې او روڼتیا په برخه کې د ټولنیز قدرت په توګه له ځانګري اهمیت څخه برخمن دی، له دې امله اطلاعاتو د لاسرسي کلتور باید د وګړو لخوا د اطلاعاتو غوښتنې له لارې پیاوړی شي او د محرمیت کلتور له منځه یوړل شي، اطلاعاتو ته لاسرسی په ولسواک نظام کې د ټولیز کنترول د یوې اغیزمنې وسیلې حیثیت لري، چې له دې لارې خلک کولای شي د دولت په پریکړو کې اغیزمن ګډون پیدا کړي.
په غونډه کې د کمیسیون د عامه پوهاوي آمر ښاغلي خلیل جیحون اطلاعاتو ته د لاسرسي قانون اړوند پرېزنټېشن وړاندې کړ او اطلاعاتو د لاسرسي د څرنګوالی، د اشخاصو ملاتړ، د اطلاعاتو د ورکړې د مودې، د اطلاعاتو د ورکړې د کړنلارې، د اطلاع رسونې د مسؤولینو، په ادارو کې د اطلاع رسونې د مسؤلینو د دندو، اطلاعاتو ته د لاسرسي د ممنوعیت، شکایتونو او هغو ته د رسېدنې، تخلفاتو او تأدیبي مؤیداتو او نورو اړوندو موضوعاتو په هکله په مفصل ډول اطلاعاتو ته د لاسرسي قانون په رڼا کې تشریحات ورکړل.
