عدلي او قضایي بنسټونو کې د اطلاعاتو ډلبندۍ کړنلارې تصویب لپاره د مدني ټولنو بنسټونو سره اطلاعاتو ته د لاسرسي کمېسیون غونډه
دا ناسته اطلاعاتو ته د لاسرسي کمېسيون رييس ښاغلي عين الدين بهادري، مرستيالې آغلې نجيبې مرام، غړې آغلې زهرا موسوي، اطلاعاتو ته د لاسرسي کمېسيون حقوقي سلاکار ښاغلي محمد حسن پویا، حقوق پوهانو د اتحاديې غړي او حقوق پوه ښاغلي وحيد فرزي، د افغانستان د عدالت موسسې رييسې آغلې ليلما ناصري او د افغانستان د روڼتیا څار ادارې حق غوښتنې مسوول ښاغلي عرفان ارزاز په شتون کې اطلاعاتو ته د لاسرسي کمېسيون په دفتر کې په عدلي او قضايي بنسټونو (د ا.ا.ج څارنوالۍ او سترې محکمه) کې د اطلاعاتو ډلبندۍ په هکله د بحث، د کمېسيون او مدني ټولنې تر منځ د ګډو همکاريو د پراختيا او پياوړتيا لپاره ترسره شوه.
په دې ناسته کې ښاغلي بهادري، ټينګار وکړ چې دا کړنلاره بايد داسې تصويب نشي اطلاعاتو ته د لاسرسي د محدوديت لامل شي بلکه اطلاعاتو ته د لاسرسي په برخه کې اسانتياوې رامنځته ته کړي. هغه زياته کړه چې په ياده کړنلاره کې د حقوق پوهانو او مدني ټولنې وړانديزونه او اندونه په پام کې ونيول شي، تر څو عدلي او قضايي بنسټونه دا کړنلاره د خپلې ګټې په پار تصويب نه کړي.
همدارنګه آغلې موسوي وويل؛ اړتيا ده چې د دې کړنلارې په تصويب کې د اطلاعاتو ډلبندي په هر اړخيز ډول په پام کې ونيول شي، تر څو په عدلي او قضايي بنسټونو کې اطلاعاتو ته د لاسرسي په برخه کې ستونزې کمې شي.
همدارنګه ښاغلي فرزي، په عدلي او قضايي بنسټونو کې د محکمو علني کولو باندې ټينګار وکړ او و يې ويل د محکمو علني کولو ګټه داده چې اطلاعاتو ته د لاسرسي حق تامينوي، هغه زياته کړه د عدلي او قضايي پريکړو ته بايد لاسرسی عام شي، همدارنګه د عدلي او قضايي بنسټونو په وېب پاڼه خپاره شي.
په پای کې وړاندې شويو اندونو ته په کتو، د حقوق پوهانو اتحاديې، مدني ټولنو استازو سره د پرلپسې مشورتي غونډو په جوړولو او په کړنلاره کې اطلاعاتو ته د لاسرسي موادو په ځايولو باندې ټينګار وشو.
