د خلاصې پالیسۍ د سلا ورکولو صنوق OPAF)) – GIZ مرستیال سره اطلاعاتو ته د لاسرسي کمېسیون د مشرتابه ناسته

دا ناسته اطلاعاتو ته د لاسرسي کمېسیون رییس ښاغلي عین الدین بهادري، د دارلانشا رییس ښاغلي عصمت الله حیدري، تخنیکي سلاکار ښاغلي ولي الله مصباح، د خلاصې پالیسۍ د سلا ورکولو صنوق OPAF) – GIZ) مرستیال ښاغلي عبدالبصیر عتیق‌زي په شتون کې، د کمېسیون د ۱۴۰۰ کال پروګرامونو مالي او تخنیکي ملاتړ لپاره د خلاصې پالیسۍ د سلا ورکولو صنوق پام را اړولو په پار ترسره شوه.

په پیل کې ښاغلي بهادري، د GIZ له همېشګي ملاتړ څخه مننه وکړه او یاد بنسټ یې د کمېسیون له غوره ملاتړ کوونکو څخه وباله. د کمېسیون رییس، د خلاصې پالیسۍ د سلا ورکولو صنوق دفتر جي آی زیډ څخه وغوښتل چې د کمېسیون غړو او کارکوونکو ته، یو داسې هېواد ته چې اطلاعاتو ته د لاسرسي حق تامینولو کې تجربې او بنسټیزې کړنې ولري د یو علمي سفر برابرولو کې همکاري وکړي.

په دې ناسته کې پرېکړه وشوه چې کمېسیون خپل وړاندیزونه په درې برخو؛ د ولایتونو په کچه د عامه پوهاوي پروګرامونو ترسره کولو کې همکاري، د کمېسیون کارکوونکو د ظرفیت لوړولو ښوونیزو پروګرامونو کې همکاري، بهرني علمي سفرونه؛ د OPAF)) - GIZ د خلاصې پالیسۍ د سلا ورکولو صنوق ته ارایه کړي.

په پای کې ښاغلي عتیق‌زي د سازماني پیاوړتیا او د کارکوونکو ظرفیت لوړولو په برخه کې د خلاصې پالیسۍ د سلا ورکولو صنوق OPAF)) – GIZ د هر اړخیزې همکارۍ ډاډ ورکړ.