د افغانستان ټول وګړي د قانون په رڼا کې مکلف دي چې د فساد پر وړاندې مبارزې په برخه کې خپل وګړیز رسالت ترسره کړي.
د شفافیت تر نوم لاندې د ۸ ورځیني کرکیټ تورنمنټ پرانېستې پرګرام کې اطلاعاتو ته د لاسرسي قانون د پوهاوي په پار اطلاعاتو ته د لاسرسي کمېسیون ګډون، دا پروګرام د ۱۳۹۹کال د لړم په ۲مه، جمعې په ورځ د ایوبي کرکټ بورډ ستډیوم کې ترسره شو.
دا پروګرام د فساد پر وړاندې مبارزې د افغانانو د یووالي موسسې په نوښت جوړ شوی وه چې اطلاعاتو ته د لاسرسي کمېسیون د عامه پوهاوي آمر ښاغلي خلیل جیحون، اطلاعاتو ته د لاسرسي حق او قانون او د فساد پر وړاندې مبارزې په برخه کې د دې حق او قانون اهمیت، د وګړیز څار، د ورزش او اطلاعاتو ته د لاسرسي حق اړیکې په هکله خبرې وکړې. ښاغلي جیحون، د وګړو په فردې او ټولیز ژوند کې د فساد لاملونو په اړه خبرې وکړې او فقر، لوږه، کډوالي او ټولې ټولنیزې او اقتصادي ستونزې یې د فساد شتوالی وښوده هغه، د وګړو د ژوند ښوالي لپاره د سرچینو نه مدیریت هم د فساد بنسټیز لامل وباله.
د ښاغلي جیحون په اند، د دولتي بنسټونو لخوا د اطلاعاتو پټول او د محرمیت دود د فساد بنسټیز لامل ګڼل کېږي، په دې برخه کې د افغانستان د دولت مهمه لاسته راوړنه، اطلاعاتو ته د لاسرسي قانون وضع کول دي. اطلاعاتو ته د لاسرسي قانون پر بنسټ د دوه طریقو له لارې کولای شو، د دولتي ادارو لخوا د اطلاعاتو له وړاندې خپرول او همدارنګه د هېوادوالو لخوا د اطلاعات غوښتلو کچې لوړولو له لارې کولای شو د محرمیت دود ته د پای ټکی کېږدو. تر څو چې وګړي د کره اطلاعاتو پر بنسټ د دولتي ادارو له کړنو څخه څارنه و نه کړي، د فساد پر وړاندې د مبارزې اصل په اصلي مانا پلي کول ناشوني دي. پر همدې اساس تاسو حق لرئ چې د ورزش د پرمختګ او همدارنګه ورزشکارانو ته د خدمت کولو په پار له ټولو دولتي بنسټونو په ځانګړي ډول له دخیلو بنسټونو څخه د ورزش او ورزشکارانو د پرمختګ چې د دولت بودجه په کې استفاده کېږي؛ د اطلاعاتو غوښتنه وکړئ او د هغوي د ټولو کړنو په هکله د فساد مخنیوي په برخه کې معلومات ولرئ.
