اطلاعاتو ته د لاسرسي کمېسیون او د خبریالانو د خوندیتوب کمېټې تر منځ د همکارۍ هوکړه لیک لاسلیک شو
د رسنیزو فعالانو او خبریالانو له پوهې او تجربې څخه د ګټې اخیستنې په موخه، په رسنیزو بنسټونو کې د شته وړتیاوو او فرصتونو څخه په ګټنې چې د دولتي بنسټونو روڼتیا، ځواب ویلو ته د حکومت اړ کول، د قانون حاکمیت او فساد پر وړاندې مبارزې لپاره هر اړخیزو او ګډو همکاریو ته اړتیا ده.
دغه هوکړه لیک اطلاعاتو ته د لاسرسي کمېسیون رییس ښاغلي عین الدین بهادري، د خبریالانو د خوندیتوب کمېټې مرستیال ښاغلي صدیق الله توحیدي او د رسنیو د استازو په شتون کې د حکومتي اطلاعاتو او رسنیو په مرکز کې، د دواړو اړخونو وړتیاوو او امکاناتو څخه په استفادې او د ټولنې د ښه پرمختګ او پراختیا لپاره اطلاعاتو ته د لاسرسي کمېسیون او د خبریالانو د خوندیتوب کمېټې تر منځ لاسلیک شو.
په دې ناسته کې ښاغلي عین الدین بهادري، اطلاعاتو ته لاسرسي د وګړو له بنسټیزو حقونو څخه وباله او هغه یې د فساد پر وړاندې مبارزې په برخه کې اغېزناکه لار وښوده. ښاغلي بهادري، لاندې بنسټیز شرطونه د سولي د پروسې د بریا په اړه مهم وبلل.
- اطلاعات په مساویانه ډول د رسنیو او وګړو د لاسرسي وړ وي.
- د سولې په پروسه کې د خبریالانو عادلانه ګډون.
- له دولتي بنسټونو سره د اطلاع رسونې په برخه کې خبریالانو ستونزې چې ځینې ادارې د اطلاعات ورکولو په اړه له رسنیو سره توپیري چلند کوي.
- د سولې د مذاکراتو د پروسې په جریان کې اطلاعاتو ته د لاسرسي حق تامینول.
- په ځینو برخو کې د اطلاع رسونې لړۍ اوس هم له ستونزو سره مخ ده خو اطلاعاتو ته د لاسرسي په برخه کې د ملاحظې وړ پرمختګونه شته.
