اداري اصلاحاتو او ملکي خدمتونو خپلواک کمېسیون سره اطلاعاتو ته د لاسرسي کمېسيون د همغږۍ ناسته
دا ناسته د اداري اصلاحاتو او ملکي خدمتونو په دفتر کې، اطلاعاتو ته د لاسرسي کمېسيون کمېشنرې آغلې زهرا موسوي، د اداري اصلاحاتو او ملکي خدمتونو د خپلواک کمېسيون کمېشنر ښاغلي حشمت الله هاشمي په شتون کې د دولتي بنسټونو ځواب ويل، د روڼتيا لپاره د زمينې برابرولو او په دې برخه کې د ګډو همکاريو په پار ترسره شوه.
په پيل کې آغلې موسوي، د دواړو کمېسيونو موخو او کړنو ته د رسېدنې لپاره د دا ډول غونډو جوړولو هرکلي تر څنګ اطلاعاتو ته د لاسرسي دود پياوړتيا او پراختيا په هکله هر اړخيزې خبرې وکړې او د ښې حکومتوالۍ په برخه کې دکمېسيون پر ژمنو چې روڼتيا، ګډون او ځواب ويل يې بنسټيز عناصر دي ټينګار وکړ ويې ويل:«روڼتيا او ځواب ويل د خلاصې حکومتوالۍ نښې دي چې د ملت او دولت ترمنځ د باور او اعتماد د کچې زياتېدو لامل کېږي، په ټولنه کې د واټنونو او بې باورۍ سبب ګرځي او د محرميت دود ته چې د فساد بنسټيز لامل دی د پای ټکی کیږدي. په ځينو دولتي بنسټونو کې محرميت او پټول د دولت او وګړو ترمنځ د بې باورۍ او واټن لامل شوي دي. يواځې اطلاعاتو ته د لاسرسي حق له لارې کولای شو يو ډيموکراتيک او د وګړو ارادې پر بنسټ دولت جوړ کړو.
ورپسې ښاغلي حشمت الله هاشمي، اطلاعاتو ته د لاسرسي کمېسيون د لاسته راوړنو په اړه خوښي وښوده او ښې حکومتوالۍ ته د رسېدو لپاره يې د دواړو کمېسيونو ماموريت يو ډول وباله او د اداري اصلاحاتو او ملکي خدمتونوې کمېسيون د کونړ په هکله، اطلاعاتو ته د لاسرسي قانون په رڼا کې د کره اطلاع رسونې ډاډ ورکړ.
په پای کې آغلې موسوي، د اداري اصلاحاتو او ملکي خدمتونو خپلواک کمېسیون له مختلفو کاري څانګو څخه ليدنه وکړه او د يادې ادارې له کارکوونکو څخه يې وغوښتل چې اطلاعاتو ته د لاسرسي حق تامينولو په برخه کې د يو دولتي کارکوونکي او همدارنګه د فعال هېوادوال په توګه خپل رسالت، اطلاعاتو ته د لاسرسي قانون په رڼا کې ترسره کړي.
