اطلاعاتو ته د لاسرسي او اداري فساد پر وړاندې مبارزې کمېسيونو تر منځ د آند غوښتلو او مشورتي ناسته
دا ناسته اطلاعاتو ته د لاسرسي کمېسيون رييس ښاغلي عين الدين بهادري، سلاکارانو، آمرينو او د اداري فساد پر وړاندې مبارزې کمېسيون کمېشنر ښاغلي سيد محمد هاشمي او ورسره پلاوي په شتون کې اطلاعاتو ته د لاسرسي کمېسيون دفتر کې؛ اداري فساد سره د مبارزې ۴ کلنې ستراتيژۍ تدوين په اړه اطلاعاتو ته د لاسرسي کمېسيون د آند غوښتلو او وړاندیزونو په پار ترسره شوه.
په پيل کې ښاغلي عين الدين بهادري، اداري فساد سره مبارزې په هکله خبرې وکړې او ستراتيژي د کړنو اصلي هسته وبلله. نوموړي ټينګار وکړ، اداري فساد سره مبارزې لپاره هغه وخت زمينه برابرېږي چې وګړو ته د ګډون عملاً زمينه برابره شي.
اطلاعاتو ته د لاسرسي کمېسيون وويل: «اداري فساد په افغانستان کې په يو دود بدل شوی او اړتيا ده چې د قانوني کړنو او اقداماتو ترڅنګ بايد دوديزه (فرهنګي) مبارزه هم ترسره شي». هغه همدارنګه د ځينو لخوا د اداري فساد توجيه د ټولنې دوديز فساد وباله.
ورپسې ښاغلي سيد محمد هاشمي، اداري فساد سره د مبارزې ۴کلنې ستراتيژۍ تدوين په برخه کې د ادارو او کارپوهانو آندونه مهم وبلل او زياته يې کړه چې د دې ستراتيژۍ تدوين په برخه کې به د ادارو او ذيدخلو بنسټونو آندونه او وړاندیزونه په پام کې ونيول شي
د دې ناستې په پای کې اطلاعاتو ته د لاسرسي کمېسيون سلاکارانو او آمرينو؛ د اداري فساد ضررونو او له فساد سره د مبارزې په برخه کې خپل آندونه، مشورې او وړاندیزونه بيان کړل.
