پېښو ته د رسېدنې په چارو کې د دولت وزارت کې د پوهاوي پروګرام
د دولتي ادارو کارکوونکو او مسوولینو ته د پوهاوي پروګرامونو په لړۍ کې، د دویم ځل لپاره پېښو ته د رسېدنې په چارو کې د دولت وزارت کارکوونکو او مسوولسنو ته اطلاعاتو ته د لاسرسي قانون او حق په هکله پوهاوي پروګرام ترسره شو.
یاد پروګرام اطلاعاتو ته د لاسرسي کمېسیون کمېشنرې آغلې زهرا موسوي، تخنیکي سلاکار ښاغلي ولي الله مصباح، مالي او اداري عمومي رییس بشیر احمد فیضي، د دې وزارت ځینو رییسانو او کارکوونکو په شتونو کې اطلاعاتو ته د لاسرسي حق او قانون په هکله ترسره شو.
په پیل کې ښاغلي فیضي، اطلاعاتو ته د لاسرسي کمېسیون غړې او کارکوونکو ته د ښه راغلاست سربېره؛ وویل: اطلاعاتو ته د لاسرسي حق تامین د ټولو مسوولیت دی چې د دولت په چارو کې پېښو ته د رسېدنې وزارت مشرتابه په یاد وزارت کې دې حق تامین لپاره ژمن دی. نوموړي د هېواد په دې حالاتو کې اطلاعاتو ته د لاسرسي قانون په اړه د پوهاوي پروګرامونه ترسره کول مهم او ارزښتناک وبلل او ټینګار یې وکړ، ټول هغه امتیازونه چې ملي او نړیوالو سندونو موږ ته اطلاعاتو ته د لاسرسي په برخه کې راکړي، باید له هغو څخه د مثبتو موخو تامین په برخه کې ګټه واخلو.
ورپسې آغلې زهرا موسوي، د خپلو خبرو په یوه برخه کې د پروګرام ګډونوالو ته وویل: اطلاعاتو ته لاسرسی د وګړو له بنسټیزو حقونو څخه دی چې د افغانستان اساسي قانون او نړیوال قوانین یې ملاتړي دي. نوموړې فساد پر وړاندې مبارزه، د روڼتیا تامین او د ادارو ځواب ویل یې اطلاعاتو ته د لاسرسي حق له ګټو څخه وبللې. آغلې موسوي زیاته کړه اطلاعاتو ته د لاسرسي حق ګټو ته په کتو دا بحث په یو ملي او نړیوال بحث باندې بدل شوی دی.
په پای کې اطلاعاتو ته د لاسرسي کمېسیون تخنیکي سلاکار او د عامه پوهاوي سرپرست آمر ښاغلي ولي الله مصباح، د یو پرېزېنټېشن له لارې اطلاعاتو ته د لاسرسي قانون؛ اطلاعاتو ته د لاسرسي اهمیت او مبنا، اطلاعاتو ته د لاسرسي قانون موخو، اطلاعاتو ته د لاسرسي قانون مبنا، د کمېسیون دندو او واکونو، د کلنیو اطلاعاتو خپرولو او د اطلاع رسونې مرجع جوړولو په هکله د ادارو مکلفیت، د اطلاع رسونې مرجع دندو، په ښه نیت او فساد پر وړانډې مبارزېپه موخه د اطلاعاتو افشا کوونکي ملاتړ او اطلاعاتو ته د لاسرسي آنلاین سېستم په هکله ګډونوالو ته هر اړخیز معلومات ورکړل.
