اطلاعاتو ته د لاسرسي آنلاین سېستم پراختیا او اصلاح په پار له مدني بنسټونو مشورتي ناسته
اطلاعاتو ته د لاسرسي کمېسیون شکایتونو ته درسېدنې او د عامه پوهاوي آمریتونو، د خپلو مشورتي غونډو په لړۍ کې اطلاعاتو ته د لاسرسي کمېسیون کمېشنرې آغلې زهرا موسوي په شتون کې اطلاعاتو ته د لاسرسي آنلاین سېستم پراختیا او پرمختګ په هکله له مدني بنسټونو سره بحث او د آندونو تبادله وکړه.
په دې ناسته کې آغلې زهرا موسوي، اطلاعاتو ته د لاسرسي دود عامولو او پیاوړتیا په برخه کې د مدني بنسټونو رول باندې خبرې وکړې او اطلاعاتو ته د لاسرسي قانون پلي کولو په پار یې دوه اړخیزو همکاریو، د اطلاع رسونې او اطلاعات غوښتلو طریقې اصلاح باندې یې ټینګار وکړ او دا کړنه یې اطلاعاتو ته د لاسرسي حق تامین لپاره مهمه وبلله. نوموړې اطلاعاتو ته د لاسرسي حق څخه سمه ګټه اخیستنه، د اطلاعاتو سمې ارزونې او تحلیل برخه کې اغېزمن وښودل، همدارنګه اطلاعاتو ته د لاسرسي آنلاین سېستم پراختیا او اصلاح په هکله د اړینو مشورو غوښتونکې شوه.
ورپسې د کمېسیون د وېب پاڼې مسوول ښاغلي نجیب الله حقیار، ګډونوالو ته اطلاعاتو ته د لاسرسي آنلاین سېستم توضیح کړ.
په پای کې د مختلفو مدني بنسټونو لخوا ګډونوالو، خپل اصلاحي آندونه او وړاندیزونه په لیکني او شفاهي ډول ارایه کړل چې د آندونو او وړاندیزونو تر تحلیل او ارزونې وروسته اطلاعاتو ته د لاسرسې آنلاین سېستم کې لازم او اړین بدلونونه راوړل کېږي.
