اطلاعاتو ته د لاسرسي آنلاین سېستم پرمختګ او پراختیا په پار د ادارو د اطلاع رسونې مسوولینو سره مشورتي ناسته
اطلاعاتو ته د لاسرسي کمېسیون، شکایتونو ته د رسېدنې آمریت، اطلاعاتو ته د لاسرسي آنلاین سېستم پرمختګ او پراختیا لپاره مشورتي غونډه وکړه چې په دې ناسته کې د ځینو ادارو اطلاع رسونې مراجعو ګډون کړی وه.
اطلاعاتو ته د لاسرسي کمېسیون هڅه کوي ترڅو د ادارو د اطلاع رسونې مرجع مسوولینو سره د غونډو او همغږیو په پایله کې د هغوی آندونه او وړاندیزونه د اطلاع رسونې وضعیت ښوالي لپاره له ځان سره ولري، ترڅو د ادارو لخوا د اطلاع رسونې او د هېوادوالو لخوا د اطلاعات غوښتلو لړۍ کې آسانتیاوې راولي.
په دې ناسته کې لومړی اطلاعاتو ته د لاسرسي کمېسیون کمېشنرې آغلې زهرا موسوي، په غونډه کې د ادارو اطلاع رسونې مسوولینو ګډون ته هرکلی ووایه او د دوی کړنې، آندونه او وړاندیزونه یې اطلاعاتو ته د لاسرسي وضعیت ښوالي په برخه کې مهم او اغېزمن وبلل. آغلې موسوي د کمېسیون او د ادارو د اطلاع رسونې مسوولینو ترمنځ ناستو او همکاریو باندې ټینګار وکړ.
ورپسې د کمېسیون تخنیکي سلاکار ښاغلي ولي الله مصباح، اطلاعاتو ته د لاسرسي آنلاین سېستم توضیح او اطلاعاتو ته د لاسرسي آنلاین سېستم په هکله د ګډونوالو د اصلاحي آندونو او وړاندیزونو غوښتونکی شو.
د غونډې په پای د ادارو د اطلاع رسونې مسوولینو، اطلاعاتو ته د لاسرسي آنلاین سېستم ښوالي په هکله خپل آندونه او وړاندیزونه په لیکني او شفاهي ډول ارایه کړل.
