د خبریالانو ورځ مبارک!
اطلاعاتو ته د لاسرسي د مشرتابه هیئت او کارکوونکي، د خبریالانو ورځ؛ ټولو هغو خبریالانو ته چې په ډېرو ګواښوونکو حالاتو کې هېوادوالو ته اطلاع رسونه کوي مبارک وايي.
خبریالي یو پاک او مقدس مسلک دی چې خبریالان د حقیقت له لارې او ګواښ څخه ډک رسالت په واسطه؛ وګړو ته موثقه او پر وخت اطلاع رسونه کوي. په ټولنه کې د خبریالانو شتون، د دولت او ملت ترمنځ د یو ارتباطي پول په توګه حیاتي او سازمان جوړونکی حیثیت لري.
له خبریالانو پرته په ټولنه کې بشپړه او سمه اطلاع رسونه ناشونې ده. همدا خبریالان دي چې له پوهې او تخصص څخه په ګټنې د ټولنې واقعیتونه په حرفي او ښه ډول اطلاع رساني کوي، همداشان خلک له واقعیتونو او پېښو څخه خبروي.
اطلاعاتو ته لاسرسی د رسنیو او خبریالانو خام مواد جوړوي. څرنګه چې په ټولنه کې اطلاعاتو ته د لاسرسي په برخه کې خبریالان له ستونزو سره مخ دي، اطلاعاتو ته د لاسرسي کمېسیون خبریالانو ته ډاډ ورکوي چې له ټولو صلاحیتونو څخه په ګټې اخیستنې او اطلاعاتو ته د لاسرسي قانون تامین په واسطه به، اطلاعاتو ته د لاسرسي پر وړانډې شته ستونزې یو د بل په همکارۍ له منځه یوسي.
اطلاعاتو ته د لاسرسي کمېسیون، یو ځل بیا د خبریالانو ورځ ټولو خبریالانو او د رسنیو کارکوونکو ته مبارک وایي او له خدای (ج) څخه ورته د لا بریالیتوبونو غوښتنه کوي.
