د اوبو چارو تنظیم ملي اداره کې اطلاعاتو ته د لاسرسي حق او قانون په هکله د پوهاوي پروګرام
اطلاعاتو ته د لاسرسي کمېسیون، اطلاعاتو ته د لاسرسي قانون پلي کولو او د اطلاع رسونې دود عامولو او پیاوړتیا په موخه، د اوبو د چارو تنظیم ملي اداره کې د پوهاوي پروګرام؛ اطلاعاتو ته د لاسرسي کمېسیون مرستیالې آغلې نجیبې مرام، د اوبو د چارو تنظیم ملي ادارې تخنیکي مرستیال احمد ویس بصیري په شتون کې ترسره شو.
په دې پروګرام کې آغلې مرام، د اطلاع رسونې مرجع مسوولینو سره د اړوندو څانګو هر اړخیزې همکارۍ باندې د ټینګار ترڅنګ، وویل؛ اطلاعاتو ته د لاسرسي قانون پلي کول ملت ته د دولت ځواب ویلو لامل کېږي. نوموړې، په دولتي ادارو کې شته اطلاعات د وګړو امانت وباله او زیاته یې کړه؛ وګړي حق لري هر وخت چې وغواړي خپل امانت ته لاسرسی ولري.
ورپسې ښاغلي بصیر د ښه راغلاست ترڅنګ وویل؛ موږ د خپلو ټولو کړنو په اړه وګړو ته ځواب ویوونکي یو او د اوبو د چارو تنظیم ملي اداره، اطلاعاتو ته د لاسرسي قانون په رڼا کې ژمنه ده، چې وګړو ته اطلاعات او ځواب ویونکي اوسي.
په پای کې ښاغلي جعفر ایشاني، اطلاعاتو ته د لاسرسي کمېسیون د عامه پوهاوي کارپوه، د يو پرېزینټیشن په وسیله اطلاعاتو ته د لاسرسي حق، اطلاعاتو ته لاسرسي قانون موخو، اطلاعاتو ته د لاسرسي طریقې، د وګړو ملاتړ، د اطلاعاتو ورکولو مودې، د اطلاعات ورکولو طریقې، اطلاع رسونې مرجع مسوولینو، په ادارو کې د اطلاع رسونې مرجع مسوولینو دندو، له وړاندې د اطلاعات خپرولو په هکله د ادارو مکلفیت، اطلاعاتو ته د لاسرسي ممنوعیتونو، شکایتونو او ورته رسېدنه، سرغړونو، تأدیبی مؤیداتو او د وګړو خوندیتوب په هکله د قانون په رڼا کې هر اړخیز معلومات وړاندې کړل.
