د سولې او ډیموکراسۍ لپاره د برابرۍ بنسټ او اطلاعاتو ته د لاسرسي کمېسیون ترمنځ د همکاریو هوکړې لاسلیک
دا هوکړه؛ اطلاعاتو ته د لاسرسي کمېسیون مرستیالې آغلې نجیبې مرام، کمېشنرې آغلې زهرا موسوي، د سولې او ډیموکراسۍ لپاره د برابرۍ بنسټ مرستیالې آغلې فروزان رسولي او اطلاعاتو ته د لاسرسي کمېسیون آمرینو په شتون کې؛ د کمېسیون مرستیالې آغلې نجیبې مرام او د نوموړې بنسټ مرستیالې آغلې فروزان رسولې لخوا لاسلیک شوه.
په پیل کې اطلاعاتو ته د لاسرسي کمېسیون مرستیالې آغلې نجیبې مرام، اطلاعاتو ته د لاسرسي حق او د دې حق تامینولو په برخه کې د مدني بنسټونو په همکارۍ خبرې وکړې او د دوی رول یې اطلاعاتو ته د لاسرسي دود پیاوړتیا او عامولو لپاره مهم وباله. همدارنګه د سولې او ډیموکراسۍ لپاره د برابرۍ بنسټ مرستیالې آغلې فروزان رسولي، په خپلو خبرو کې هېوادوالو ته اطلاعاتو ته د لاسرسي حق او قانون په اړه د عامه پوهاوي او ښوونیزو پروګرامونو په برخه کې اطلاعاتو ته د لاسرسي کمېسیون سره د ګډ کار ډاډ ورکړ.
د سولې او ډیموکراسۍ لپاره د برابرۍ بنسټ، د فعاله مدني بنسټونو له ډلې څخه یوه هغه ده؛ چې د افغانستان پنځو (کابل، هرات، بامیان، ننگرهار او بلخ) ولایتونو کې د شبکې جوړونې او د مدني ټولنو د همغږۍ پروګرامونه یې د ښځو په مشرتابه پیل کړي دي؛ چې وکولای شي د پرمختیایي پروژو او همدارنګه د عامه بنسټونو لخوا د خدمتونو وړاندې کولو څخه د ډاډمنتیا او د دولتي بنسټونو کړنو روڼتیا څخه څارنه وکړي.
اطلاعاتو ته د لاسرسي قانون پر بنسټ، هېوادوال هغه وخت کولای شي د دولتي بنسټونو له کړنو په دومداره توګه څارنه وکړي چې په ادارو کې شته اطلاعاتو ته په بشپړه توګه لاسرسی ولري. پر همدې بنسټ اطلاعاتو ته د لاسرسي کمېسیون، اطلاعاتو ته د لاسرسي دود پیاوړتیا په پار د هېوادوالو د پوهې کچې لوړولو، په ښې حکومتوالې کې د وګړو ګډون ته د زمینې برابرولو، د وګړو ټولنیز څار پیاوړتیا په پار د سولې او ډیموکراسۍ لپاره د برابرۍ بنسټ سره د همکاریو هوکړه لاسلیک کړه. ترڅو وکولای شي اطلاعاتو ته د لاسرسي حق تامین په برخه کې خپلې کړنې تر ولایتونو پورې وغځوي.
