د اطلاعات او فرهنګ وزارت د پلان او پالیسۍ له رییس سره اطلاعاتو ته د لاسرسي کمېسیون د مشرتابه غونډه

دا غونډه اطلاعاتو ته د لاسرسي کمېسیون کمېشنر او منشي ښاغلي حمدالله ارباب، د دارالانشا رییس ښاغلي عصمت الله حیدري، د عامه پوهاوي آمر ښاغلي خلیل جیحون، د اطلاعات او فرهنګ وزارت د پلان او پالیسۍ رییس ښاغلي عبدالمقیم افغان په شتون کې د کمېسیون په دفتر کې تر سره شوه.

په پیل کې ښاغلي ارباب، اطلاعاتو ته د لاسرسي حق، د کمېسیون جوړښت او د کمېسیون کړنو په هکله هر اړخیز معلومات ورکړل. هغه، اطلاعاتو ته لاسرسی د بشر حقونو له ډلې وباله او اطلاعاتو ته د لاسرسي حق پلي کولو په برخه کې یې د اطلاعات او فرهنګ وزارت د همکارۍ غوښتنه وکړه.

همدارنګه ښاغلي افغان، له کمېسیون سره د اطلاعات او فرهنګ وزارت له همکاریو څخه ډاډ ورکړ. هغه وویل؛ اطلاعات او فرهنګ وزارت، به په ډېر نېږدې راتلوونکي کې د (SARC) په همکارۍ د انځورونو سیالۍ تر سره کړي. ښاغلي افغان، ژمنه وکړه چې په یاده سیالۍ کې به اطلاعاتو ته د لاسرسي کمېسیون ته یو غرفه په نظر کې ونیسي؛ تر څو کمېسیون خپلې کړنې خلکو ته وښيي.