له یو شمېر ځوانانو سره اطلاعاتو ته د لاسرسي کمېسیون غړي ښاغلي حمدالله ارباب لیدنه
دا لیدنه اطلاعاتو ته د لاسرسي کمېسیون کړنو او فعالیتونو سره د بلدتیا په موخه اطلاعاتو ته د لاسرسي کمېسیون غړي ښاغلي حمدالله ارباب په کاري دفتر د کمېسیون د دارالانشا ریاست رییس ښاغلي عصمت الله حیدري او یو شمېر ځوانانو په شتون کې تر سره شو
په پیل کې ښاغلي حمدالله ارباب، د کمېسیون د کړنو او فعالیتونو، هیوادوالو ته د قانون پلي کولو په اړه د پوهاي، اطلاعاتو ته د لاسرسي کړنلارو او ستراتېژۍ جوړولو په اړه معلومات وړاندې کړل او اطلاعاتو ته د لاسرسي دود پیاوړي کولو په برخه کې یې د ځوانانو ژمنتیا اړینه وبلله. هغه ځوانان د ټولنې مهم عناصر وګڼل او د هغوی رول یې د قانونو په پلي کولو کې موثر وښود. همدارنګه یې یادونه وکړه چې ځوانان باید د ټولنې په سرنوشت کې خپله فعاله ونډه تر سره کړي.
په پای کې ځوانانو د کمېسیون له جوړښت څخه هیله مندې او خوشحالي وښوده او د فساد پر وړاندې مبارزې او ښې حکومتوالۍ په برخه کې یې د کمېسیون کړنې اغیزمنې وبللې.
