اطلاعاتو ته د لاسرسي کمېسیون نه د ولسمشرۍ ماڼۍ، عمومي اړيکو او ستراتېژیکې ادارې رییس او ورسره پلاوي لیدنه
یکشنبه ۱۳۹۸کال، د سلواغې۱۳
د ولسمشرۍ ماڼۍ عمومي اړيکو او ستراتېژیکې ادارې رییس ښاغلي وحید عمراو ور سره پلاوي، اطلاعاتو ته د لاسرسي کمېسیون څخه لیدنه وکړه.
په پیل کې اطلاعاتو ته د لاسرسي کمېسیون رییس ښاغلي عین الدین بهادري، ښاغلي وحید عمر او ور سره پلاوي ته ښه راغلاست ووایه او د کمېسیون مهمو لاسته راوړنو لکه: د تشکیلاتو پراختیا، په بریښنایي ډول د اطلاعات غوښتلو سیستم جوړول، اطلاعاتو ته د لاسرسي ۵ کلنې ستراتېژۍ جوړول، د اطلاعات غوښتلو او شکایتونو ته د رسیده ګۍ پروسه، د مسوولو ادارو له وړاندې اطلاعاتو خپرولو څارنه او په اکاډمیکو، مدني او ټولنیزو بنسټونو کې د عامه پوهاوي پروګرامونو پلي کولو په اړه لنډ معلومات وړاندې کړل.
ورپسې مرستیالې آغلې نجیبې مرام، د کمېسیون غړو آغلې زهرا موسوي او ښاغلي حمدالله ارباب، د کمېسیون پلي کېدونکو پروګرامونو په برخه کې جدي ستونزو په هکله خبرې وکړې او د کمېسیون رسمي ماموریت یې د دولت او ملت تر منځ د اړیکو پیاوړتیا، په دولتي ادارو کې د روڼتیا او د ادارو ځواب ویل وګړو ته عنوان کړل.
ښاغلي وحید عمر، د کمېسیون له کړنو نه خوښي وښوده او د دواړو بنسټونو ګډو کارونو باندې یې په تفصیل خبرې وکړې. اطلاعاتو ته د لاسرسي کمېسیون یې د ښې حکومتوالۍ لپاره مهم اصل وګاڼه. ښاغلي عمر د ولسمشرۍ ماڼۍ د عمومي اړيکو او ستراتېژیکې ادارې له هر اړخیزو همکاریو، له کمېسیون او اطلاعاتو ته دلاسرسي قانون د پلي کولو په برخه کې ډاډ ورکړ.
د یادولو وړ ده چې ښاغلی وحید عمر د ولسمشرۍ ماڼۍ دفتر ویاندې آغلي وزیري، د حکومتي رسنیو مرکز رییس ښاغلي فیروز بشري، د مطبوعاتي برخې سلاکار ښاغلي صافي او د حکومتي رسنیو مرکز تولیدي او نشراتي ریاست نه د ښاغلي طاهر لخوا بدرګه کېده.
