کابل کې د هند سفیر سره اطلاعاتو ته د لاسرسي کمېسیون رییس او غړو لیدنه
۱۳۹۸کال، مرغومي۲۶، پنجشنبه
اطلاعاتو ته د لاسرسي کمېسیون رییس او غړو د هندوستان سفیر وینيکمار سره په کابل کې د یاد هېواد په سفارت کې ولیدل. په دې لیدنه کې د کمېسیون رییس عین الدین بهادري، مرستیالې نجیبې مرام او کمېشنرانو حمدالله ارباب، زهرا موسوي ګډون درلود. د دغې لیدنې هدف د دواړو هېوادونو تجربو شریکولو په ځانګړې توګه اطلاعاتو ته د لاسرسي په اړه د فرصتونو او خنډونو په اړه بحث وشو، څو هند هېواد په دې برخه کې همکاري ترسره کړي.
په پیل کې ښاغلي عین الدین بهادري، اطلاعاتو ته د لاسرسي قانون او جوړښت په اړه لنډ معلومات وړاندې کړل، چې د افغانستان اساسي قانون پنځوسمې مادې حکم په اساس تصویب شوی. ښاغلي بهادري، اطلاعاتو ته د لاسرسي حق پلي کولو لپاره د کمېسیون غړو او کارکوونکوسره د تجربو شریکولو او د ادارو اطلاع رسوونې مسوولینو ته د پوهاوي پروګرامونو برابرولو غوښتنه وکړه.
ورپسې په کابل کې د هند سفیر په تېرو دوو لسیزو کې تاریخي اړیکو ته په کتو له افغانستان سره د بیارغونې په برخه کې په مالي مرستو خبرې وکړې.
نوموړي په دوو اړخیزو اړیکو او مرستو ټینګار وکړ او همدا شان به اطلاعاتو ته د لاسرسي فرهنګ په دودولو کې دواړه لوري خپلې تجربې او همکارۍ شریکې کړي.
ورپسې د کمېسیون غړو اغلې نجیبې مرام، حمدالله ارباب او زهرا موسوي د هند هېواد له مالي مرستو، تحصیلي بورسونو، د ځوانانو د ظرفیت لوړونې په برخه کې د همکاري په پار مننه وکړه همدا شان دوی د افغان ځوانانو لپاره تحصیلي بورسونه او د پروژو تطبیقېدل لومړیتوب وباله.
اطلاعاتو ته د لاسرسي کمېسیون په ولسواکه ټولنه کې د ښې حکومتولۍ په برخه کې ژمن دی، چې اطلاعاتو ته د لاسرسي قانون په ښه ډول پلی کړي، څو اطلاعاتو ته د لاسرسي فرهنګ پیاوړی او عام شي.
