د پلازمینې زون پراختیا ادارې د کمیسیون سره په ناسته کې اطلاعاتو ته د لاسرسي له پلي کیدو څخه ډاډ ورکړ
چهارشنبه د لیندۍ ۲۷مه ۱۳۹۸ کال
په دې ناسته کې احمد فیصل عزیزی د پلازمینې زون پراختیا ادارې د عامه اړیکو او بازار موندنې آمر د خپلې ادارې د فعالیتونو په اړه د کمیسیون غړو او کارکوونکو ته مفصل معلومات وړاندې کړل او زیاته یې کړه چې: د پلازمینې زون پراختیا اداره د ښاري سالم چاپیریال رامنځته کولو او په پایتخت کې د هره ورځ په تیریدو د زیاتیدونکي نفوس له امله د رامنخته شوو ستونزو د حل لپاره، جوړه شویده، چې د افغانستان اسلامی جمهوري دولت په اډانه کې د مستقلې بودجې په درلودو سره فعالیت کوي.
نوموړي له کمیسیون څخه وغوښتل تر څو د ۱۳۹۹ لپاره د اطلاع رسونې او عامه پوهاوي پلان په اړه د قانون د ښه تطبیق په موخه لازمې مشورې له دوی سره شریکې کړي، د عزیزي په وینا، زموږ موخه داده چې د قانون د حکمونو پر اساس زموږ په اداره کې شته اطلاعات پرته له غوښتنې، مخکې له مخکې وګړو ته د لاسرسي وړ وي.
ښاغلي حمدالله ارباب د یادې ادارې له کړنو څخه په مننې سره وویل چې: د محرمیت کلتور حاکمیت په اداراتو کې د فساد یو ستر عامل دی، نوموړي زیاته کړه چې وګړو ته د اطلاعاتو وړاندې کول په پراختیایی پروژو کې د هغوی د ګډون یو اساسي عنصر ګڼل کیږي.
همد راز اغلې زهرا موسوي د ویبپاڼې تر څنګ د ټولنیزو شبکو له لارې د اطلاعاتو پر خپرولو ټینګار وکړ او د کمیسیون لخوا د ویبپاڼو د څارنې په موخه، پر برابر شوي فارمت رڼا واچوله، نوموړې د پلازمینې زون پراختیا ادارې له مسئوولینو غوښته وکړه تر څو د دوی په اداره کې شته اطلاعات له غوښتنې مخکې له خلکو سره، شریک کړی شي.
