فساد سره د مبارزې نړیوالې ورځ په اړه د ښاغلي عین الدین بهادري پیغام
د ډسمبر ۹مه فساد سره د مبارزې نړیوالې ورځ سره سمون لري، دولتونه مکلفیت لري تر څو د نړیوالو کنوانسیونونو پر اساس، خپلې ژمنې فساد سره د مبارزې په برخه کې پلې کړي، د افغانستان دولت فساد سره د مبارزې په برخه رغنده ګامونه پورته کړي دي، اطلاعاتو ته د لاسرسی کمیسیون رامنځته کول چې د پرانستې دولتدارۍ په برخه یوه اړین امر شمیرل کیږي، دا یې یوه ښه بیلګه ده.
کمیسیون د رامنځته سره سم نه، د دولتي ادارو لخوا د اطلاعاتو نشرولو او حساب ورکولو به پرخه کې نه سټرې کیدونکې هلې ځلې کړي دي، د اطلاعاتو د نشر له څرنګوالي څخه څارنه او د متقاضیانو د غوښتنو پر وړاندې چارواکي ځواب ورکونې ته هڅول، د روڼتیا او حساب ورکونې عیني بیلګې دي، اطلاعاتو ته د لاسرسي کمیسیون د هیواد وګړو ته د ځواب ورکوونکو سیستمونو په رامنځته کولو باور لري او د دې سیسټمونو شتون په اداراتو کې بنسټیزه اړتیا بولي او د اطلاعاتو څرخیدل او هغو ته لاسرسۍ د دولتدارۍ په ټولو کچو کې د اداري فساد سره د مبارزې مؤلفه ګڼي، که څه هم چې د ښې حکومتولۍ رامنځته کیدو لپاره جدي هڅې شوې دي، خو په اداري جوړښتونو کې د فساد پیچلتیا، ډیرو تګلارو ته اړتیا لري ترڅو ادارې خپل د ځواب ورکونې څرنګوالي د وګړو د اړتیا سره سم چمتو کړي، د روڼتیا نړیوال سازمان په جدول کې له ۱۱ څخه ۱۶ ته د افغانستان ارتقاء هیله مندتیا رامنځته کوي او د فساد سره د مبارزې ښکارندوینه کوي، خو بیا هم په دې لړ کې هڅې باید پیاوړې او پراخې شي.
اطلاعاتو ته د لاسرسي کمیسیون سیستماټیکې هڅې کړيدې تر څو وګړنیز او ځواب ویونکي سیسټمونه اطلاعاتو ته د لاسرسي حق د تعمیم لپاره رامنځته کړي، چې ښه بیلګه یې اطلاعاتو ته د لاسرسي آنلاین سیسټم جوړول دي.
له بلې خوا کمیسیون په دې باور دی چې اداري فساد د دولت د ثبات لپاره یو جدي ګواښ دی او ښایي چې د فساد مرتکبینو پر وړاندې له غیر معافیتي لارو چارو څخه کار واخستل شي، په دې اساس اطلاعاتو ته د لاسرسي کمیسیون د محرمیت کلتور ختمول په پام کې لري او د ښې حکومتولۍ رامنځته کیدو ته ژمن دی او له ټولو هغو فرصتونه څخه به کار اخلي، کوم چې کولی شي په اداراتو کې فساد له منځه یوسي.
