د پروان ولایت والي سره اطلاعاتو ته د لاسرسي کمیسیون د رئیس ښاغلي عین الدین بهادری او ددې کمیسیون د غړي ښاغلي فضل الباري بریالي لیدنه
نېټه: یکشنبه د چنګاښ ۲ مه، ۱۳۹۸ هجري لمریز
اطلاعاتو ته د لاسرسي کمیسیون رئیس ښاغلي عین الدین بهادري پرون مازیګر د پروان ولایت والي سره اطلاعاتو ته د لاسرسي د وضعیت، د اطلاع رسونې د مراجعو د رامنځته کولو، په ولایتي کچه له وړاندې د اطلاعاتو د خپراوي او همدارنګه په دغه ولایت کې د عامه پوهاوي د بهیر د څرنګوالي په اړه د پروان ولایت د ټولو اداري مسؤلینو په شتون کې وکتل.
د لیدنې په ترڅ کې د پروان والي ښاغلي فضل الدین عیار اطلاعاتو ته د لاسرسي کمیسیون رئیس او غړي ته د مننې او ښه راغلاست ویلو ترڅنګ اطلاعاتو ته د لاسرسي په تړاو له خپل اړخه د هر ډول مرستې او همکارۍ ژمنه وکړه او زیاته یې کړه موږ غواړو چې د اطلاع رسونې فرهنګ دود شي او خلک د حکومت له کړنو او خدماتو خبر شي. په ولایتي کچه له وړاندې د اطلاعاتو د خپرولو اړوند نوموړي زیاته کړه چې په دې اړه باید د کمیسیون سره په همغږۍ سیمینارونه او کنفرانسونه جوړ شي او اطلاعات له خلکو سره شریک شي. هغه ژمنه وکړه چې د پروان ولایت د اطلاع رسونې مسؤل به د اطلاعاتو او فرهنګ د رئیس سره په همغږۍ معرفي کوي او هر ډول اطلاعات به د قانون سره سم له خلکو سره شریکوي. هغه همدارنګه اطلاعاتو ته د لاسرسي اړوند د ګډو هڅو او کړنو په ترسره کولو ټینګار وکړ او ژمنه یې وکړه چې اطلاعاتو ته د لاسرسي موضوع به په پروان ولایت کې اطلاعاتو ته د لاسرسي له قانون سره سمه دودوي او د ولایت د اداري مسؤلیتونو څخه به یې شمېري.
