د اطلاع رسوني او شفافيت په موخه د کرکټ بورډ له رئيس سره کتنه
نن مو د کرکټ بورډ له رئيس ښاغلي عزيزالله فضلي سره د کرکټ بورډ له خوا د اطلاع رسوني د مسئول د ټاکلو او ولس ته د حساب ورکولو په موخه وکتل. موږ وويل هره اداره اطلاعاتو ته د لاسرسي د قانون له مخي مکلفه ده چي خپل فعاليتونه له ولس سره شريک کړي او د شفافيت لپاره کار وکړي.
ښاغلي فضلي ژمنه وکړه چي د اطلاع رسوني مسئول به راوپېژني او د خپلي ادارې او کرکټ په باب به ټول معلومات د هغه له لاري خپروي خو د ملي لوبډلي لپاره د لوبغاړو غوراوی، د حکومت او ICC له خوا د تخصيص شوې بودجې مصرف او له نورو هيوادونو سره مخکي له مخکي د سياليو په باب د معلومات وړاندي کول چي د دواړو هيوادو اړيکي خرابوي، محرم ياد کړل.
د ناستي په پای کي پرېکړه وشوه چي يوازي د دغو دريو مواردو د محرميت او غيرمحرميت د اثبات په باب به د کرکټ بورډ حقوقي مسئولين له کميسيون سره خپل دلايل شريکوي او پرېکړه به کميسيون کوي چي دا موارد محرم دي، کنه.
اوس تاسو کولای شئ چي په ډاډه زړه له کرکټ بورډ څخه هر ډول معلومات ترلاسه کړئ.
