اطلاعاتو ته د لاسرسي کمېسیون کارکوونکو ته د ظرفیت لوړولو پروګرام پرانېستې پروګرام
اطلاعاتو ته د لاسرسي کمېسیون، د جي آی زیډ په مالي او د mgtwellکمپنۍ په تخنیکي همکارۍ، د کمېسیون عملیاتي کارکوونکو ته د ظرفیت لوړولو پروګرامونه طرحه کړي چې نن د یو محفل په لړ کې د کمېسیون او د یادې کمپنۍ مشرتابه او کارکوونکو په شتون کې د دې پروګرام دوه څانګې پیل شوې.
په دې هکله چې کوم محفل جوړ شوی وه، لومړی اطلاعاتو ته د لاسرسي کمېسیون رییس ښاغلي عین الدین بهادري، د giz موسسې له همکاریو او د دولتي ادارو کارکوونکو ظرفیت لوړتیا په برخه کې د mgtwell شرکت کړنو څخه د مننې ترڅنګ وویل:« د یو سازمان لپاره د وګړو ظرفیت جوړونه د اداري اصولو مهم اصل دی». ښاغلي بهادري دا پروګرام د کمېسیون کارکوونکو ته د مسلکي کېدو او بنسټ جوړونې په برخه کې مهمې وبللې او زیاته یې کړه؛ کله چې مسوولیت مننه، د ژمنتوب احساس، وګړو ته د ښه خدمتونو وړاندې کولو په برخه کې د ملي ګټو په پام کې نیول؛ د دولتي مسوولینو او کارکوونکو رفتاري اصولو په توګه په پام کې ونیول شي، د ملي روحیې د پیاوړتیا او د ټولنې د پایښت لامل کېږي.
اطلاعاتو ته د لاسرسي کمېسیون رییس، د کمېسیون د کارکوونکو ظرفیت جوړونه باندې ټینګار وکړ او وګړو ته د دوی له ظرفیتونو سمه او اغېزمنه ګټه اخیستنه یې مهمه وبلله.
ورپسې د mgtwell شرکت حقوقي سلاکار ښاغلي هېواد یار، د دولتي ادارو د چارو پر مخ وړلو په برخه کې د کارکوونکو ظرفیت لوړولو اهمیت په اړه خبرې وکړې او ژمنه یې وکړه چې د کمېسیون د کارکوونکو ظرفیت جوړونه کې به هېڅ ډول هڅې و نه سپموي.
د یادولو وړ ده چې دا پروګرامونه په پنځو مختلفو برخو کې اطلاعاتو ته د لاسرسي کمېسیون کارکوونکو ته ترسره کېږي.
