اطلاعاتو ته د لاسرسي آنلاین سېستم پرمختګ او پراختیا په پار د ادارو د اطلاع رسونې مرجع مسوولینو سره مشورتي ناسته
اطلاعاتو ته د لاسرسي کمېسیون، شکایتونو ته د رسېدنې آمریت، د دوهم ځل لپاره د دولتي ادارو اطلاع رسونې مرجع مسوولینو سره مشورتي ناسته وکړه.
په پیل کې اطلاعاتو ته د لاسرسي کمېسیون رییس ښاغلي عین الدین بهادري، اطلاعاتو ته د لاسرسي وضعیت په برخه کې د هېوادوالو، اطلاع رسونې مسوولینو، مدني بنسټونو او رسنیو د آندونو اهمیت په هکله خبرې وکړې.
اطلاعاتو ته د لاسرسي کمېسیون رییس، د ادارو د اطلاع رسونې مرجع مسوولینو د کړنو او اجرااتو د هرکلي ترڅنګ؛ مدرن حکومتوالۍ لپاره، اطلاعات غوښتونکو ته په نړیوالو معیارونو سره له ټکنالوژۍ په ګټې اخیستنې اطلاع رسونه یوه اړینه کړنه وبلله. نوموړي د اطلاع رسونې او اړوندو ټولو وګړو د وړاندیزونو او آندونو په پایله کې اطلاعاتو ته د لاسرسي آنلاین سېستم کې پرمختګ او پراختیا باندې ټینګار وکړ.
ورپسې د کمېسیون د وېبپاڼې مسوول ښاغلي نجیب الله حقیار، ګډونوالو ته اطلاعاتو ته د لاسرسي آنلاین سېستم توضیح کړ.
د غونډې په پای د کمېسیون شکایتونو ته د رسېدنې آمریت آمر ښاغلي رحمت الله پیروزي، اطلاعاتو ته د لاسرسي آنلاین سېستم پراختیا او پرمختګ په برخه کې د آندونو او وړاندیزونو غوښتنونکی شو چې د ادارو د اطلاع رسونې مسوولینو، خپل آندونه او وړاندیزونه په لیکني او شفاهي ډول ارایه کړل.
