د اساسي قانون پر پلي کېدو د څار کمېسیون کې اطلاعاتو ته د لاسرسي حق او قانون په هکله د پوهاوي پروګرام
دا پروګرام اطلاعاتو ته د لاسرسي کمېسیون کمېشنرې آغلې زهرا موسوي، د اساسي قانون پر پلي کېدو د څار کمېسیون رییس ښاغلي قانونپوه ډاکټر محمد هاشمزي په شتون کې؛ اطلاعاتو ته د لاسرسي حق او قانون په اړه د هېوادوالو پوهاوي کچې لوړتیا لپاره ترسره شو.
آغلې موسوي، د دواړو کمېسیونو جوړېدو موخه د قوانیونو پلي کېدو څخه څارنه وبلله او د دواړو کمېسیونو په ګډو همکاریو او همغږیو باندې یې ټینګار وکړ. نوموړې زیاته کړه؛ څرنګه چې اطلاعاتو ته د لاسرسي قانون، د اساسي قانون پنځوسمې مادې په رڼا کې تصویب شوی؛ نو په ټولنه کې اطلاعاتو ته د لاسرسي قانون پلي کول د اساسي قانون د یوې څانګې پلي کولو په مانا ده.
آغلې موسوي، په حکومتوالۍ کې ګډون، فساد پر وړاندې مبارزه او روڼتیا؛ اطلاعاتو ته د لاسرسي حق اهمیت وګاڼه او اطلاعاتو ته لاسرسی یې فساد پر وړاندې مبارزې په برخه کې بنسټیز میکانیزم وښود. موسوي، په ډیموکراټیکو نظامونو کې اطلاعاتو ته د لاسرسي آزادي اصل وباله او ویې ویل؛ ممنوعیتونه چې فرعي برخې دي، د ازادو اطلاعاتو پر وړاندې باید خنډ نشي.
همدارنګه د اساسي قانون پر پلي کېدو د څار کمېسیون رییس ښاغلي قانونپوه ډاکټر محمد هاشمزي، د کمېسیون مشرتابه او د عامه پوهاوي ټیم ته د هر کلي ترڅنګ د اطلاعاتو په ازادۍ ټینګار وکړ او ویې ویل؛ زموږ دنده د اساسي قانون پلي کولو څخه څارنه ده او اطلاعاتو ته د لاسرسي حق د دې قانون مهمه برخه ده، همداشان اطلاعاتو ته د لاسرسي حق تامین په ادارو کې د روڼتیا ضامن دی. ښاغلي هاشمزي، اطلاعاتو ته د لاسرسي کمېسیون سره د اساسي قانون پر پلي کېدو د څار کمېسیون همکاریو څخه ډاډ ورکړ.
په پای کې ښاغلي جعفر ایشاني، اطلاعاتو ته د لاسرسي کمېسیون د عامه پوهاوي کارپوه، د يو پرېزینټیشن په وسیله اطلاعاتو ته د لاسرسي حق، اطلاعاتو ته لاسرسي قانون موخو، اطلاعاتو ته د لاسرسي طریقې، د وګړو ملاتړ، د اطلاعاتو ورکولو مودې، د اطلاعات ورکولو طریقې، اطلاع رسونې مرجع مسوولینو، په ادارو کې د اطلاع رسونې مرجع مسوولینو دندو، له وړاندې د اطلاعات خپرولو په هکله د ادارو مکلفیت، اطلاعاتو ته د لاسرسي ممنوعیتونو، شکایتونو او ورته رسېدنه، سرغړونو، تأدیبی مؤیداتو او د وګړو خوندیتوب په هکله د قانون په رڼا کې هر اړخیز معلومات وړاندې کړل.
