زېرمو او پترولیم وزارت کې اطلاعاتو ته د لاسرسي حق او قانون په هکله د پوهاوي پروګرام
اطلاعاتو ته د لاسرسي کمېسیون د زېرمو او پترولیم وزارت سره په همغږۍ، اطلاعاتو ته د لاسرسي حق او قانون په هکله د پوهاوي پروګرام؛ اطلاعاتو ته د لاسرسي کمېسیون کمېشنر ښاغلي حمدالله ارباب، د زېرمو او پترولیم وزارت د پروګرامونو د پالیسۍ مرستیال ښاغلي عتیق الله ذکې په شتون کې د یاد وزارت کارکوونکو ته ترسره شو.
ښاغلي حمدالله ارباب چې په یاد پروګرام کې خبرې کولې وویل:« که څه هم د افغانستان اطلاعاتو ته د لاسرسي قانون، د نړۍ په کچه غوره قانون دی؛ نو د دې قانون پلي کولو په برخه کې د دولتي ادارو هر اړخیزه همکاري اړینه ده». ښاغلي ارباب، اطلاعاتو ته د لاسرسي کمېسیون دندې او مسوولیتونه توضیح کړل او له وړاندې د اطلاعات خپرولو باندې یې ټینګار وکړ. د کمېسیون غړي د فساد پر وړاندې مبارزې په برخه کې اطلاعاتو ته لاسرسی مهم عنصر وباله او د یاد وزارت له مشرتابه یې وغوښتل چې د ښې حکومتوالۍ په پار په دې اداره کې شته اطلاعاتو ته د هېوادوالو لاسرسي ته زمینه برابره کړي.
ورپسې ښاغلي عتیق الله ذکي، اطلاعاتو ته د لاسرسي حق په اړه خبرې وکړې ویې ویل:« اطلاعاتو ته لاسرسی د ښې حکومتوالۍ له اساسي شرطونو څخه ده او د ښې حکومتوالۍ تامینول، هېوادوالو ته اطلاعاتو ته د لاسرسي حق زمینې برابرولو پورې تړاو لري». نوموړي روڼتیا او په تړلو حکومتونو کې د محرمیت دود پای ته رسول، اطلاعاتو ته د لاسرسي موخې وبللې. ښاغلي ذکي زیاته کړه؛ د زېرمو او پترولیم وزارت، اطلاعاتو ته د لاسرسي حق تامینولو ته ژمن دی او هڅه کوي په دې اداره کې شته اطلاعاتو ته د هېوالو لاسرسي ته لا ښه زمینه برابره کړي. هغه همدارنګه زیاته کړه: یاد وزارت په دې آند دی چې اطلاعاتو ته لاسرسي په برخه کې آسانتیا د روڼتیا او ځواب ویلو کچې د لوړتیا لامل کېږي.
په پای کې ښاغلي خلیل جیحون، اطلاعاتو ته د لاسرسي کمېسیون د عامه پوهاوي کارپوه، د يو پرېزینټیشن په وسیله اطلاعاتو ته د لاسرسي حق، اطلاعاتو ته لاسرسي قانون موخو، اطلاعاتو ته د لاسرسي طریقې، د وګړو ملاتړ، د اطلاعاتو ورکولو مودې، د اطلاعات ورکولو طریقې، اطلاع رسونې مرجع مسوولینو، په ادارو کې د اطلاع رسونې مرجع مسوولینو دندو، له وړاندې د اطلاعات خپرولو په هکله د ادارو مکلفیت، اطلاعاتو ته د لاسرسي ممنوعیتونو، شکایتونو او ورته رسېدنه، سرغړونو، تأدیبی مؤیداتو او د وګړو خوندیتوب په هکله د قانون په رڼا کې هر اړخیز معلومات وړاندې کړل.
