د افغان سرې میاشتې اطلاع رسونې مرجع مسوولینو سره اطلاعاتو ته د لاسرسي کمېسیون ګډه ناسته
اطلاعاتو ته د لاسرسي کمېسیون د څارنې او ارزونې آمریت د افغان سرې میاشتې د اطلاع رسونې مرجع مسوولینو سره، اطلاعاتو ته د لاسرسي حق تامین او قانون پلي کولو، په دې اداره کې د اړیکو پیاوړتیا او اغېزمنو همکاریو په پار ګده ناسته ترسره شوه.
دا ناسته اطلاعاتو ته د لاسرسي کمېسیون د دارالانشا رییس ښاغلي عصمت الله حیدري، د څارنې او ارزونې آمر ښاغلي محمد داود فیاض، د افغان سرې میاشتې د اطلاع رسونې مسوول نورآقا صاحب زاده اود همکارانو په شتون کې یې پیل شوه.
په پیل کې ښاغلي عصمت الله حیدري، په ډیموکراټیکو نظامونو کې ځواب ویل او حساب ورکول د ښې حکومتوالۍ له بنسټیزو اړتیاو وګڼل او زیاته یې کړه: په ډیمکراټیکو نظامونو کې حکومت د وګړو او د وګړو لپاره ده. پر همدې بنسټ د ادارو مسوولین، د خدمتونو وړاندې کولو او نورو ټول کړنو په هکله د وګړو پر وړاندې ځواب ویلو باندې ملزم دی. همدارنګه په دې ناسته کې د کمېسیون د دارالانشا رییس، اطلاعاتو ته د لاسرسي حق تامین ګټو په هکله خبرې وکړې او د افغان سرې میاشتې ټولنې اطلاع رسونې مرجع مسوولینو څخه یې وغوښتل، ترڅو اطلاعاتو ته د لاسرسي دود عامولو او پیاوړتیا په برخه کې هر اړخیزې هڅې وکړي.
په دې ناسته کې کمېسیون ته د اطلاع رسونې مرجع مسوولینو راپور ورکولو، اطلاعاتو ته د لاسرسي قانون پنځلسمې مادې په رڼا کې له وړاندې د اطلاعات خپرولو، اطلاعاتو ته د لاسرسي آنلاین سېستم څخه د ګټې اخیستنې، په بنسټونو کې د اطلاع رسونې مرجع مسوولینو ستونزو او حل لارو په هکله بحث او د اندو تبادله وشوه.
ورپسې د یاد بنست د اطلاع رسونې مسوولینو،اطلاعاتو ته د لاسرسي حق او قانون پلي کولو په برخه کې اطلاعاتو ته د لاسرسي کمېسیون له همکاریو او مشورو هرکلی وکړ او د سرې میاشتې په اداره کې یې اطلاعاتو ته د لاسرسي حق او قانون تامین څخه یې ډاډ ورکړ.
