د اطلاع رسونې مرجع مسوولینو په آند د قانون پلي کولو پر وړاندې د فرصتونو او ستونزو شننه
اطلاعاتو ته د لاسرسي یو ورځیني بحث یوه برخه، اطلاعاتو ته د لاسرسي کمېسیون کمېشنرې آغلې زهرا موسوي، د کمېسیون د دارالانشا رییس ښاغلي عصمت الله حیدري په شتون کې د ادارو د اطلاع رسونې مرجع مسوولینو لخوا اطلاعاتو ته د لاسرسي په برخه کې د ستونزو او فرصتونو په اړه ډلییز بحث او خبرې وکړې.
اطلاعاتو ته د لاسرسي قانون وضع او د کمېسیون له رامنځته کېدو راپدېخوا اطلاعاتو ته د لاسرسي دودولو او پیاوړتیا په برخه کې ښه پرمختګونه شوي دي خو سربېره د دې پرمختګونو، د دولتي ادارو لخوا د اطلاع رسونې په برخه کې د شته ستونزو څخه هم سترګې نشو پټولی. څېړنې ښیي چې اطلاعاتو ته د لاسرسي په برخه کې شته ستونزې یو اړخیزې نه دي، بلکه کولای شو هغه له څو اړخونو تحلیل او وڅېړو.
په دې پروګرام کې د اطلاع رسونې مرجع مسوولینو، اطلاعاتو ته د لاسرسي په برخه کې د شته ستونزو او فرصتونو په هکله هر اړخیز بحث وکړ. د ستونزو له منځه وړلو او له فرصتونو څخه د ګټې اخیستنې لپاره یې خپل وړاندیزونه کمېسیون وړاندې کړل. ترڅو اطلاعاتو ته د لاسرسي کمېسیون او د ادارو د اطلاع رسونې مرجع مسوولینو ترمنځ د همکاریو په وسیله د ځانګړو پروګرامونو او پلانونو په واسطه اطلاعاتو ته د لاسرسي قانون پر وړاندې ستونزې او نیمګړتیاوې له منځه لاړې شي.
د ادارو د اطلاع رسونې مرجع مسوولینو؛ اطلاعاتو ته د لاسرسي کمېسیون رامنځته کېدل، انلاین سېستم جوړول، د کنفرانسونو دایرول، د اطلاع رسونې مرجع مسوولینو ته د ښوونیزو او پوهاويپروګرامونو ترسره کول، وګړو او دولتي کارکوونکو ته د پوهاوي پروګرامونه، د اطلاع رسونې لپاره د الکترونیکي او مجازي پاڼو شتون اطلاعاتو ته د لاسرسي حق پلي کولو کې مهم فرصتونه وګڼل. د ادارو د مشرتابه لخوا د اطلاع رسونې مرجع مسوولینو نه همکاري او ملاتړ، د دفتري امکاناتو، تجهیزاتو او ځانګړې شعبې نشتون، وګړو ته د پوهاوي پروګرامونو پڅوالی، د ځینو ادارو لخوا اطلاعاتو ته د لاسرسي قانون په پام کې نه نیول، د اطلاع رسونې مرجع مسوولینو ترمنځ نه همغږي، اطلاعاتو ته د لاسرسي حق او قانون پلي کولو کې له جدي ستونزو وښودې.
همدارنګه د اطلاع رسونې مرجع مسوولینو، اطلاعاتو ته د لاسرسي کمېسیون له هر اړخیز ملاتړ څخه ټینګار وکړ او د کمېسیون لخوا د حق غوښتنې او ښوونیزو پروګرامونو د زیاتوالي غوښتونکي شول ترڅو اطلاعاتو ته د لاسرسي قانون ښه پلی شي.
د دې پروګرام په پای کې اطلاعاتو ته د لاسرسي کمېسیون د دارالانشا رییس ښاغلي عصمت الله حیدري؛ د اطلاع رسونې مرجع مسوولینو خبرو، ارزونو او د اندونو تبادلې باندې بحث وکړ او په عمومي ډول یې د پروګرام پایله وړاندې کړه او د اطلاع رسونې مرجع مسوولینو څخه يې د هر اړخیز ملاتړ ژمنه وکړه.
