د رسنیو شکایتونو ته د رسېدنې لپاره اطلاعاتو ته د لاسرسي کمېسیون او رسنیو ترمنځ د همکاریو اوهمغږۍ ناسته
دا ناسته اطلاعاتو ته د لاسرسي کمېسیون رییس ښاغلي عین الدین بهادري، منشي او کمېشنر ښاغلي حمدالله ارباب، د دارالانشا رییس ښاغلي عصمت الله حیدري په شتون کې د طلوع نیوز، یک تلویزیون، شمشاد تلویزیون، پژواک خبري آژانس، سلام وطندار، کلید رادیو خبریالانو سره د رسنیو او کمېسیون ترمنځ د همکارۍ، همغږۍ او د قضایي، امنیتي او جنایي پېښو په هکله د رسنیو شکایتونو ته د رسېدنې په ځانګړي ډول د طلوع تلویزیون مخکېني خبریال یما سیاوش او د افغانستان بانک نورو کارکوونکو د ترور په تړاو د اطلاعات نه ورکولو په پار ترسره شوه.
په پیل کې خبریالانو، په ادارو کې شته اطلاعاتو ته د خبریالانو نه لاسرسي په هکله خپلې ستونزې د کمېسیون مشرتابه سره شریکې کړې او د ځینو ادارو لخوا د قضایي، امنیتي او جینایي پېښو په اړه په ځانګړي توګه د یما سیاوش د ترور په هکله د افغانستان بانک څخه د اطلاعات نه ورکولو په پار شکایت وکړ.
ورپسې ښاغلي بهادري، ډاډ ورکړ چې کمېسیون به د خبریالانو او رسنیو ټولو ستونزو ته رسېدنه وکړي او د افغانستان بانک یې یو له تړلو ادارو وښوده او ویې ویل؛ اطلاعاتو ته د لاسرسي کمېسیون به د تړلو ادارو، ځواب ویلو، په ځانګړي ډول د افغانستان بانک په برخه کې له ټولو قانوني لارو ګته واخلي. ترڅو ټولې رسنۍ او وګړۍ په ادارو کې شته اطلاعاتو ته لاسرسی ولري.
د کمېسیون رییس زیاته کړه، ادارې باید اطلاعاتي سېستم رامنځته کړي چې ټول غوښتل شوي اطلاعات او اړین اطلاعات ځواب ویونکي وي.
ښاغلي ارباب وویل: حکومت مکلف دی چې د قانون په رڼا کې اطلاعات له رسنیو او وګړو سره شریک کړي. هغه همدارنګه له رسنیو وغوښتل چې اطلاعاتو ته د لاسرسي حق او قانون پلي کولو کې همکاري وکړي.
