دملي تلویزیون ولایتي خبریلانو ته اطلاعاتو ته د لاسرسي حق او قانون په هکله د پوهاوي پروګرام ترسره شو
اطلاعاتو ته د لاسرسي کمېسیون د افغانستان ملي راډیو تلویزیون په همکارۍ، د افغانستان ملي راډیو تلویزیون ۳۴ ولایتي خبریالانو ته اطلاعاتو ته د لاسرسي حق او قانون په هکله د پوهاوي پروګرام ترسره شو. د دې پروګرام موخه اطلاعاتو ته د لاسرسي په برخه کې د ګډونوالو د پوهاوي کچې لوړل وه؛ تر څو وکولای شي اطلاعاتو ته د لاسرسي قانون د معیارونو په رڼا کې د ولایتونو په کچه روڼتیا پیاوړې او په دولتي بنسټونو کې د ځواب ویلو کچې لوړولو په پار استفاده وکړي.
اطلاعاتو ته د لاسرسي کمېسیون په استازلی د عامه پوهاوي آمر ښاغلي خلیل جیحون، د څارنې او ارزونې آمر ښاغلي محمد داوود فیاض ګډون کړی و. په پیل کې ښاغلي خلیل جیحون د کمېسون د تېرو دوه کلونو مهمو کړنو او د راتلوونکي کال د پلان شویو پروګرامونو په هکله هر اړخیز معلومات شریک کړل. ورپسې د سکالو له اړخه اطلاعاتو ته د لاسرسي حق ډلبندي، د وګړو فعال ګډون په برخه کې اطلاعاتو ته د لاسرسي اهمیت، د دولتي بنسټونو کړنو کې روڼتیا، د وګړو پر وړاندې د ادارو ځواب ویل، د فساد پر وړاندې واقعي مبارزې، د اطلاعات غوښتلو میکانیزم، غوښتونکو ته د دولتي ادارو لخوا د اطلاعات ورکولو مودې، اطلاعاتو ته د هېوادوالو لاسرسي تګلارې، د غوښتونکو شکایتونو ته د رسېدنې، اطلاعاتو ته د لاسرسي انلاین سېستم جوړښت او له دې سېستم څخه د هېوادوالو استفادې په هکله اړین توضیحات ورکړل.
د کمېسیون د عامه پوهاوي آمر، اطلاعاتو ته د هېوادوالو لاسرسی د روڼ او ځواب ویونکي حکومت په رامنځته کولو کې مهم او اغېزمن ګام وښود؛ نوموړي همدارنګه د فساد پر وړاندې مبارزې په برخه کې اطلاعاتو ته د لاسرسي حق څخه په استفادې ټینګار وکړ. ښاغلي جیحون له ګډونوالو وغوښتل چې سیمه ییزې حکومتوالي کې د مثبت بدلون لپاره له خپل بشري او وګړیز حق څخه استفاده وکړي
په پای کې ښاغلي محمد داوود فیاض د خبریالانو پوښتونو ته ځوابونه ورکړل او په یوه ټولیزه جمع بندي یې پروګرام پای ته ورساوه.
