دکمیسیون او شمشاد تلویزیون ترمنځ د دوه اړخیزو همکاریو د همغږۍ ناسته اطلاعاتو ته د لاسرسي کمیسیون د خپل پنځه کلن ستراتیژیک پلان له مخې، په پام کې لري چې په راتلونکو کلونو کې خپل فعالیتونه اطلاعاتو ته د لاسرسي اړوندو او ذینفغو بنسټونه سره، پراخ او همغږي کړي
په دې اساس د ۱۳۹۹ کال د لړم په ۱۸مه نیټه ښاغلي حمدالله ارباب او ورسره پلاوي یې د شمشاد تلویزیون د نشراتو له رئیس ښاغلي میرویس ستانکزي او خبر څانګې له مدیر ښاغلي عابد احساس سره ګډه ناسته تر سره کړه او اطلاعاتو ته د لاسرسي لا پراختیا او له دې حق څخه د ولس د پوهاوي اړوند دوه اړخیزو همکاریو رامنځته کولو په اړه یې تفصیلی خبرې اترې وکړې.
په دې ناسته کې هوکړه وشوه چې شمشاد تلویزیون به په خپل نشراتي محتوا کې د بیلابیلو خپرونو له لارې اطلاعاتو ته د لاسرسي اړوند بحثونو، شننو او مرکو ته، ځای ورکړي، تر څو د دې حق په اړه د خلکو او رسنیو پوهاوی زیات شي او اطلاعاتو ته لاسرسی په یو دود بدل شي.
دا ناسته په داسې حال کې تر سره کیږي چې د کمیسیون د هلو ځلو سره سره، په دې وروستیو کې رسنۍ پرخپل وقت او دقیقو اطلاعاتو ته د نه لاسرسي څخه سر ټکوي.
د غوڼدې په پای کې یادونه وشوه چې د دوه اړخیزو همکاریو د ښه انسجام په موخه به د دواړو ادارو تر منځ یو هوکړه لیک هم، لاسلیک شي او د رسنیو اړوند ستونزو ته د رسیدنې لپاره به د کمیسیون، د رسنیو ملاتړو بنسټونو او حکومت تر منځ د همغږۍ او مشورتي ناستې تنظیم شي، تر څو داسې یو میکانیزم رامنځته کړي، چې رسنۍ وشي کړای د حکومت له آدرسه کره او پرخپل وقت اطلاعاتو ته په اسانۍ لاسرسی ولري.
په پای کې د کمیسیون په استازیتوب د شمشاد تلویزیون څخه د یادو همکاریو په پار مننه وشوه.
