د ولسمشرۍ ماڼۍ د چارو ادارې د اطلاع رسونې مرجع مسوولينو سره د يادې ادارې څخه د شويو شکايتونو په اړه اطلاعاتو ته د لاسرسي کمېسيون ناسته
دا ناسته اطلاعاتو د لاسرسي کمېسيون د مرستيالې آغلې نجيبې مرام، د غړې آغلې زهرا موسوي، شکایتونو ته د رسېدنې آمر، د څارنې او ارزونې آمر او د ولسمشرۍ ماڼۍ د چارو ادارې عمومي ریاست د اطلاع رسونې مسوولينو په شتون کې اطلاعاتو ته د لاسرسي کمېسيون په دفتر کې ترسره شوه.
په دې ناسته کې د ولسمشرۍ ماڼۍ د چارو ادارې عمومي ریاست څخه د شویو شکایتونو په هکله خبرې اترې وشوې. په پيل کې آغلې نجيبې مرام د ولسمشرۍ ماڼۍ د چارو ادارې په همکارۍ د ټينګار سربېره وويل:« د قانون پلي کول بايد لومړی د ولسمشرۍ ماڼې د چارو ادارې څخه پيل شوې او ټولو ادارو ته بايد نمونه وي». هغې زياته کړه د قانون پلي کولو کې همکاري او د قانون پر بنسټ غوښتونکو ته د ادارو ځواب ويل د ټولو ادارو مکلفيت دی.
ورپسې آغلې زهرا موسوي، د اطلاعاتو خپرولو او د اطلاعاتو ورکولو په هکله خبرې وکړې او ويې ويل:« اطلاعاتو ته د لاسرسي حق، د اطلاعاتو د آزادۍ په مانا او ممنوعيتونه د استثناآتو له ډلې څخه دي». پر دې بنسټ ادارې مکلفې دي چې د ټولو خپلو کړنو او کارونو په هکله راپور جوړ او د عامه وګړو په واک کې يې ورکړي. آغلې موسوي زياته کړه، اطلاعاتو ته لاسرسی يو بشري حق دی؛ غوښتونکي مکلف نه دي چې د اطلاعات غوښتلو لپاره خپلې ځانګړتياوې او دليلونه وړاندې کړي.
د ولسمشرۍ ماڼۍ د چارو ادارې عمومي ریاست د اطلاع رسونې مسوولینو د اطلاع رسونې په برخه کې د خپلو کړنو، کارونو، ستونزو او خنډونو مطرح کړل او د کمېسيون د مشرتابه د همکارۍ غوښتونکي شول.
په پای کې د اطلاع رسونې د چارو ښوالي په اړه پرېکړه وشوه چې د چارو ادارې له مشرتابه نيولې تر مسوولينو او کارکوونکو اطلاعاتو ته د لاسرسي قانون په هکله د پوهاوي پروګرامونه ترسره شي او د غوښتونکو شکايتونو ته د رسېدنې په پار د کمېسيون د استازو، غوښتونکو او د اطلاع رسونې مسوولينو په شتون کې ناستې ترسره شي.
