د ولسمشرۍ ماڼۍ د چارو ادارې د شتمنیو د ثبت او څېړلو عمومي ریاست سره اطلاعاتو ته د لاسرسي کمېسیون د مشرتابه لیدنه
اطلاعاتو ته د لاسرسي کمېسیون رییس ښاغلي عین الدین بهادري او غړي ښاغلي حمدالله ارباب، د ولسمشرۍ ماڼۍ د چارو ادارې د شتمنیو د ثبت او څېړلو عمومي رییس ښاغلي عبدالودود بشریار سره د دولتي ادارو مقاماتو او مسوولینو شتمنیو ثبت او څېړو په هکله اطلاعاتو ته د لاسرسي قانون په رول باندې خبرې وکړې.
په دې لیدنه کې د حکومتي مسوولینو او مقاماتو د شتمنیو ثبت او د اطلاع رسونې بهیر په هکله په ګډو همکاریو او همغږي باندې خبرې وشوې. همدارنګه اطلاعاتو ته د لاسرسي قانون په رڼا کې په اطلاع رسونې باندې ټینګار وشو.
ښاغلي عین الدین بهادري او حمدالله ارباب، د دولتي مقاماتو او مسوولینو د شتمنۍ په برخه کې اطلاعاتو ته د لاسرسي حق تامینولو باندې ټینګار وکړ او د ادارو او د شتمنۍ ثبت او څېړو ادارو لخوا یې خپرول د هغوی مکلفیت وباله.
ښاغلي عبدالودود بشریار، د دولتي مقاماتو د شتمنیو ثبت او د اطلاع رسونې په اړه د کمېسیون مشورې او همکارۍ د فساد پر وړاندې مبارزې په برخه کې مهمې وبللې او د شتمنیو ثبت ادارې سره اطلاعاتو ته د لاسرسي کمېسیون د همکاریو غوښتونکي شول.
